काठमाडौँ । पश्चिम दाङका एक जना कोरोना भाइरस (कोभिड–१९) संक्रमितको उपचारका क्रममा मृत्यु भएको छ । मृत्यु हुनेमा शान्तिनगर गाउँपालिका २ निवासी ८० वर्षीय पुरुष रहेका छन् ।

गत माघ १६ गते पिसिआर परीक्षण गर्दा उनलाई कोरोना पुष्टि भएपछि बाँकेमा उपचार गर्न लगिएको थियो । उनको गएराति १२ बजे उपचारका क्रममा मृत्यु भएको बाँकेका कोभिड फोकलपर्सन तेज वलीले जानकारी दिए ।

यसैबीच बितेको २४ घण्टामा जिल्लामा ६४ जनामा कोरोना संक्रमण पुष्टि भएको छ । २५० जनाको एन्टिजेन परीक्षण गर्दा ५९ र १० जनाको पीसिआर परीक्षण गर्दा पाँच गरी ६४ जनामा कोरोना संक्रमण पुष्टि भएको जिल्ला आपत कालीन कार्य सञ्चालन केन्द्र दाङले जनाएको छ ।