काठमाडौँ । आगामी वैशाख ३० गते हुने स्थानीय निर्वाचनका लागि गृह मन्त्रालयले अर्थ मन्त्रालयसँग रकम माग गरेको छ । गृहले अर्थसँग १७ अर्ब ६० करोड ५५ लाख रुपैयाँ निर्वाचन खर्च माग गरेको गृह मन्त्रालयले स्रोतले जनाएको छ ।

गृह मन्त्रालयले चालूतर्फ १२ अर्ब १४ करोड ८८ लाख र पूँजीगततर्फ ५ अर्ब ४५ करोड ६७ लाख रुपैयाँ माग गरेको हो । यो रकम निर्वाचन गर्न नेपाल प्रहरी र सशस्त्र प्रहरीका लागि खर्च हुने मन्त्रालयले जनाएको छ ।

यसअघि बुधबार गृह मन्त्री बालकृष्ण खाँण र अर्थमन्त्री जनार्दन शर्माबीच निर्वाचन लक्षित बजेटबारे छलफल भएको थियो । गृह मन्त्रालयमा भएको छलफलमा निर्वाचन लक्षित बजेटमा विशेष गरी सुरक्षा निकाय (नेपाल प्रहरी र सशस्त्र प्रहरी)का लागि अत्यावश्यक सवारी साधन र बन्दोबस्तीका सामानबारे कुराकानी भएको नीति, योजना, अनुगमन तथा मूल्यांकन महाशाखा प्रमुख सहसचिव डा. भिष्मकुमार भूसालले जानकारी दिएका थिए ।

छलफलमा अर्थमन्त्री शर्माले निर्वाचनमा अर्थ मन्त्रालयलाई परेको चापबारे गृह मन्त्री खाँणलाई अवगत गराउँदै अत्यावश्यक पर्ने विषयबारे जानकारी गराउन आग्रह गरेका थिए । सो क्रममा गृह मन्त्री खाँणले अर्थ मन्त्रालयलाई परेको दबाबबारे गृह मन्त्रालय सचेत रहेको भन्दै नभई नहुने विषय वस्तुबारे अवगत गराइने बताए ।