काठमाडौं । सत्ताघटक जनता समाजवादी पार्टी जसपाका संघीय परिषद् अध्यक्ष डा बाबुराम भट्टराईले एमसीसीको विरोध गर्नेहरु सरकार बस्न नमिल्ने बताएका छन् । कांग्रेस सभापति तथा प्रधानमन्त्री शेरवहादुर देउवाले आजको संसद बैठकमार्फत नै एमसीसी अगाडी बढाउन चाहेका बेला सत्ता घटक माओवादी केन्द्र र एकीकृत समाजवादी विरोधमा रहेका बेला अर्काे सत्ता घटक दल जसपाका नेता बाबुरामको यस्तो प्रतिक्रिया आएको हो ।

एमसीसी सहयोग परियोजना मात्रै नभएर देशको परराष्ट्र र विकास नीतिसँग जोडिएको भन्दै उनले एमसीसीको विरोध गर्नेहरुलाई सरकारबाट बहिरिन सामाजिक सन्जालमार्फत आग्रह गरेका हुन् ।

माओवादी केन्द्र र नेकपा एसलाई लक्षित गर्दै उनले सत्ताको तर मार्ने अनि बाहिर साखुल्ले बन्ने छुन नहुने बताएका हुन् ।

‘एमसीसीको मुद्दालाई एउटा विकास अनुदानको विषय मात्र नबनाएर देशको परराष्ट्र नीति, राज्यप्रणाली र विकास नीतिको विषय बनाउने हो भने यसका समर्थक र विरोधीहरू एउटै गठबन्धन-सरकारमा बस्न मिल्दैन !’ उनले भनेका छन्, ‘सत्ताको तर पनि मार्ने र बाहिर साखुल्ले हुने छुट हुनुहुदैन । भेडा भेडासँग बाख्रा बाख्रासँग हुनु राम्रो !’