काठमाडौं । नेकपा एमालेका नेता तथा मुगुका सांसद मोहन बानियाँलाई बलात्कार अभियोगमा पक्राउ पुर्जी जारी गरिएको छ ।

पूर्वमन्त्री समेत रहेका बानियाँले बाँकेस्थित अप्सरा होटलमा जबरजस्ती करणी गरेको भन्दै जुम्लाकी एक ४० वर्षीया शिक्षिकाले मुद्दा हालेकी थिइन् ।

पीडित महिलाले दिएको किटानी जाहेरीका कारण प्रहरीले एमाले सांसद बानियाँलाई पक्राउ पुर्जी जारी गरेको हो ।

जबरजस्ती करणी गरेको मुद्दामा जिल्ला अदालत बाँकेले पक्राउ पुर्जी जारी गर्न आदेश दिएको हो ।

महिलाको जाहेरीको आधारमा बिहीबार बानियाँविरूद्ध जबरजस्ती करणी मुद्दा जिल्ला प्रहरी कार्यालय बाँकेमा दर्ता भएको जिल्ला प्रहरी प्रवक्ता डिएसपी मुधुसूदन न्यौपानेले बताए ।

सांसद बाँनियालाई पक्राउ पूर्जी जारी गरिएकोबारेमा प्रहरीले प्रतिनिसभाका समामुखलाई समेत जानकारी गराइसकेको छ ।

पक्राउ पूर्जी जारी गरी प्रहरीले बाँनियालाई खोजी रहेको प्रहरीले जनाएको छ ।

शिक्षिकाको उजुरीपछि एमाले सांसद पूर्वमन्त्री बानियाँले आफू निर्दोष रहेको भन्दै आफैं प्रहरीमा उपस्थित हुने प्रहरीलाई बताएका थिए । आफै प्रहरी कार्यालयमा उपस्थित हुने बताएपनि उनी त्यसपछि सम्पर्कविहिन रहेको प्रहरीले जनाएको छ ।

पीडित शिक्षिकाले आफूले दिएको २५ लाख रुपैयाँ फिर्ता गर्छु भनेर होटलमा बोलाएको र त्यही होटलमा बिहानीपख जबरजस्ती करणी गरेको जाहेरीमा उल्लेख गरेकी छन् ।