भक्तपुर । भक्तपुुरको सुडालमा भएको दुर्घटनामा परी एक आठ वर्षीया बालिकाको मृत्यु भएको छ । चाँगुनारायण नगरपालिका ८ सुडाल रानीबारीमा इँटा भट्टामा काम गर्ने विनिता मगरको मृत्यु भएको हो ।

सुडालबाट च्यामासिंहतर्फ आउँदै गरेको बा ४ ख ७३५२ नम्बरको टिपरले पैदलयात्री काभ्रे महाभारत गाउँपालिका २ घर भई हाल सुडालस्थित द्यः इँटा भट्टामा काम गर्ने सूर्यबहादुर मगरकी छोरीलाई ठक्कर दिँदा गम्भीर घाइते भएकी उनको मृत्यु भएको हो ।

उपचारका लागि ख्वप अस्पताल च्यामासिंह भक्तपुर लगेर प्राथमिक उपचारपछि थप उपचारका लागि मध्यपुर अस्पताल ठिमी लगेकोमा उपचारकै क्रममा आइतबार सोही अस्पतालमा मृत्यु भएको प्रहरीले जनाएको छ ।

चालक भक्तपुर नगरपालिका ८ जेला बस्ने २७ वर्षका राजेश कुस्मा र दुर्घटनामा संलग्न सवारी साधन महानगरीय प्रहरी वृत्त जगाती भक्तपुरको नियन्त्रणमा रहेको महानगरीय प्रहरी परिसर भक्तपुरले जनाएको छ ।