काठमाडौँ । अमेरिकी सहयोग परियोजना मिलिनियम च्यालेञ्ज कर्पोरेशन (एमसीसी)को विषय टुंगोमा पुर्याउन एमालेसँग छलफल गर्नुअघि नेपाली कांग्रेसका नेताहरूको बैठक सुरु भएको छ । प्रधानमन्त्री निवास बालुवाटारमा कांग्रेसका शीर्ष नेताहरुबीच बैठक सुरु हुने भएको हो ।

बैठकमा सहभागी हुन कांग्रेस नेताहरु बालुवाटार जान थालेका छन् । प्रधानमन्त्रीसमेत रहेका पार्टी सभापति शेरबहादुर देउवा, उपसभापति पूर्णबहादुर खड्का, महामन्त्री गगन थापा, सञ्चारमन्त्री ज्ञानेन्द्रबहादुर कार्कीसहितका नेताहरू बैठकमा बस्ने भएका छन् ।

पार्टीको बैठकपछि आजै ३ बजे कांग्रेस नेताहरू प्रमुख प्रतिपक्षी दल नेकपा एमालेका अध्यक्ष केपी शर्मा ओलीसँग वार्ता गर्ने भएका छन् । एमसीसीलाई संसदबाट टुंगोमा पुर्याउन कांग्रेसले ओलीसँग पटकपटक वार्ता गर्दै आएको छ ।

छलफलका लागि आज पनि प्रधानमन्त्री देउवासहित कांग्रेस नेताहरू ओली निवास बालकोट जाने भएको हो ।