काठमाडौँ । अमेरिकी राष्ट्रपति जो बाइडेनले १२ हजार सेनालाई रुसी सीमा रहेका लातभिया, इस्टोनिया, लिथुनिया, रोमानियामा सारेको बताएका छन् । रुसी फौजले युक्रेनका मुख्य सहरमा हमला तीव्र पारेको अवस्थामा अमेरिकाले आफ्नो सेनालाई अन्य देशमा पठाएको हो ।

रुसले युक्रेनको राजधानीलाई घेरा हालिरहेको भन्ने विवरण सार्वजनिक भइरहेका बेला १२ हजार अमेरिकी सेनालाई रुससँगको सीमा रहेका देशमा सारेका हुन् । हाउस डेमोक्रयाटिक काउकसका सदस्यलाई सम्बोधन गर्दै बाइडेनले युक्रेनमा तेस्रो विश्व युद्ध नलड्ने तर नेटो क्षेत्रको प्रत्येक इन्चको रक्षा गर्ने उचित सन्देश पठाउने बचन दिएका छन् ।

उत्तर एट्लान्टिक ट्रिटी संगठन नेटो उत्तर अमेरिका र युरोपका ३० देशको समूह हो । राजनीतिक र सैन्य माध्यममार्फत आफ्ना सदस्यको स्वतन्त्रता र सुरक्षाको सुनिश्चित गर्नु यसको उदेश्य हो । रुसी हमलामा युक्रेनीले उदाहरणीय वीरता र साहस प्रदर्शन गरेको बाइडेनले बताएका छन् ।