काठमाडौँ । सत्ता गठबन्धन दल जनता समाजवादी पार्टी (जसपा)ले पार्टीको केन्द्रीय सदस्य तथा सांसद प्रमोद साहमाथि भएको हमलाप्रति आपत्ति जनाएको छ । आज बिहान सर्लाहीको ईश्वरपुर नगरपालिकामा नेकपा एमालेका कार्यकर्ताले साहमाथि सांघातिक हमला गरेको भन्दै जसपाले विज्ञप्तिमार्फत आपत्ति जनाएको हो ।

‘पार्टी कामको सिलसिलामा गृह जिल्ला पुग्नु भएका मा. साहमाथि सुनियोजित ढंगबाट आक्रमण गरी घटना घटाइ उहाँलगायत दर्जनौं कार्यकर्ता घाइते हुने गरी भएको निन्दनीय कार्यको जनता समाजवादी पार्टी घोर भर्त्सना गर्दछ,’ विज्ञप्तिमा भनिएको छ ।

जसपाले एमालेले घृणित र अपराधिक क्रियाकलाप बन्द नगरे यसबाट उत्पन्न हुने परिणामको जिम्मेवार स्वयं एमाले हुने जनाएको छ । उक्त घटनाका दोषीमाथि अविलम्ब कारबाही गर्न तथा शान्ति सुरक्षाको प्रत्याभूति गर्न जसपाले माग गरेको छ ।

घाइते भएका साहलाई हेलिकप्टोरमार्फत थप उपचारका लागि काठमाडौँ ल्याइएको छ ।