जुम्ला । जिल्लामा म्यादी प्रहरीको लागि खोलिएको आवेदनमा दुई हजार २८५ जनाको दरखास्त परेको छ । स्थानीय तह निर्वाचनका लागि चैत ६ देखि ११ गतेसम्म म्यादीको भर्ना आवेदन लिइएको थियो ।

सो अवधिमा म्यादीका लागि ५३१ जना महिला र १७ सय ५४ जना पुरुषले आवेदन दिएको जिल्ला प्रहरी कार्यालय जुम्लाका प्रहरी नायव उपरीक्षक नरेन्द्र चन्दले बताए । उनले भने, ‘जुम्लाका लागि सात सय ६८ जना म्यादी प्रहरी भर्ना गर्नु पर्ने हो ।’

तर, यहाँ दुई हजार दुई सय ८५ जनाको दरखास्त परेको छ । उनका अनुसार म्यादी प्रहरी भर्ना लागी दरखास्त दिनेको घुइचो लागेको छ । २२ गतेभित्र म्यादीको अन्तिम नतिजा निकाल्नु पर्ने छ ।

प्रहरी नायव उपरीक्षक नरेन्द्र चन्दले भने, ‘छनोटको मापदण्डसमेत निर्धारण गरिएको छ । १८ वर्षभन्दा माथि र ५४ वर्ष भन्दा तलाका नागरिकले दरखास्त दिन पाउने छन् ।’

आगामी निर्वाचनलाई लक्षित गरी भर्ना भएका म्यादी प्रहरीको कार्यअवधि ४० दिनको हुने प्रहरी जवान हस्तबहादुर बुढा मगरले बताए । त्यसका लागि मासिक ३० हजार दुई सय ४० रुपैयाँ पारिश्रमिक निर्धारण गरिएको छ ।