काठमाडौँ । खानेपानीमन्त्री उमाकान्त चौधरीले प्रधानमन्त्रीको सरकारी निवाससमेत रहेको बालुवाटार क्षेत्रमा आगामी वर्षदेखि ढलको समस्या नआउने बताएका छन् । उनले ढलको समस्या नहुने गरी काम थालिएको र प्रमुख प्रशासकीय केन्द्र सिंहदरबारमा पनि अबको दिनमा काम गरिने बताए ।

बालुवाटार क्षेत्रमा प्रधानमन्त्रीसहित सभामुख, राष्ट्रियसभाका अध्यक्ष, प्रधानन्यायाधीशको सरकारी निवास र नेपाल राष्ट्र बैंकको केन्द्रीय कार्यालय परिसर क्षेत्रमा प्रत्येक वर्ष आउने बर्सातको फोहोर पानी र ढललाई व्यवस्थापन गर्न सुरु भएको निर्माणको मंगलबार शिलान्यास गर्दै मन्त्री चौधरीले अब ढलको समस्या समाधान हुने बताएका हुन् । सो स्थानमा सुरु भएको निर्माणले काठमाडौँ महानगरपालिका वडा नं २, ३ र ४ को क्षेत्रमा रहेको ढलको समस्या समाधान गर्ने छ ।

मन्त्री चौधरीले आगामी आर्थिक वर्षमा मुलुकको प्रमुख प्रशासनिक क्षेत्र सिंहदरबारभित्र र बाहिर पनि ढलको व्यवस्थापनको कार्य अघि बढाइने बताए । आगामी आवमा सिंहदरबारभित्र र वरिपरिको क्षेत्रमा देखिएको ढलको समस्यालाई व्यवस्थापन सिंहदरबार पुनःनिर्माण गुरुयोजनालाई असर नपर्ने गरी काम अघि बढाइने उनको भनाइ छ । उनले भने, ‘सबै क्षेत्रका महत्वपूर्ण स्थानमा देखिएको फोहोर पानी र ढलको व्यवस्थापनको काम अगाडि बढाइने छ ।’

ठेक्काको जिम्मेवारी पाएको निर्माण व्यवसायीले निर्धारित समयभन्दा पहिले नै काम सम्पन्न गरेमा सरकारबाट ‘बोनस’ पाउने मन्त्री चौधरीले बताए । मन्त्री चौधरीले निर्धारित समयभन्दा अगाडि र गुणस्तरमा कुनै सम्झौता नगरी काम गर्न निर्माण व्यवसायीलाई आग्रह गर्दै वडाका जनप्रतिनिधिको साथ र सहयोगबाट आयोजना सम्पन्न हुने विश्वास व्यक्त गरे ।

खानेपानी सचिव सुरेश आचार्यले प्रधानमन्त्रीको सरकारी निवास क्षेत्र र काठमाडौँ महानगरपालिकाका तीन वडाका बासिन्दाले आयोजना सम्पन्न भएपछि ढलको समस्याबाट मुक्ति पाउने र सडक प्रयोगकर्ताले सुविधा पाउने बताए ।