काठमाडौँ । नेपालले मलेसियालाई ८५ रनले पराजित गरेको छ । त्रिवि मैदान कीर्तिपुरमा सम्पन्न खेलमा नेपालले मलेसियालाई विशाल रनले पराजित गरेको हो ।

नेपालले ५ विकेटको क्षतिमा २० ओभर खेल्दै २२३ रन बनाएको थियो । जसमा दीपेन्द्र सिंह ऐरीले ११० रनको शतक हाने ।जवाफी ब्याटिङमा उत्रिएको मलेसियाले १९.५ ओभर खेल्दै १३८ रन बनाएर अलआउट भएको हो ।

नेपालका लागि कप्तान सन्दीप लामिछानेले ३ विकेट लिएका थिए भने करण सिंह ऐरी र दीपेन्द्र सिंह ऐरीले समान २–२ विकेट लिए । यस्तै, अभिनाश बोहरा, कुशल भुर्तेल र रोहित पौडेलले १–१ विकेट लिए ।

नेपालका ऐरीले ५७ बल खेल्दै ११० रनको शतक हानेका हुन् । उनी ६ छक्का र १० चौकाको मद्दतमा ११० रन बनाउँदै अविजित रहे ।

दीपेन्द्र ओडीआई र टी २० आईमा शतक प्रहार गर्ने दोस्रो नेपाली खेलाडी बनेका छन् । यसअघि पूर्व कप्तान पारस खड्काले मात्रै दुवै फर्म्याटमा शतक हानेका थिए ।

यस्तै, रोहित पौडेलले पहिलो अर्धशतक प्रहार गरे । उनले ३४ बल खेल्दै ५ चौका मद्दतमा ५१ रन बनाए । यी दुई खेलाडीले तेस्रो विकेटका लागि ९६ रनको साझेदारी गरे ।

ओपनर आसिफ शेखले १८ र कुशल भुर्तेलले १२ रन बनाएर फर्किए । आरिफ शेख २ रन बनाएर आउट हुँदा आदिल अन्सारीले १४ रन जोडे ।

मलेसियाको बलिङमा मलेसियाका लागि मुहम्मद वाफिक, पवनदिप सिंह, स्याज्रुल ईद्रुस र मुहम्मद अमिरले समान १–१ विकेट लिए ।

ब्याटिङतर्फ मलेसियाका ओपनर भिरन्दीप सिंहले सर्वाधिक ४७ रन जोडे । उनले २६ बल खेल्दै ९ चौका प्रहार गरे । अर्का ओपनर जुबैदी जुलकिफेले गोल्डेन डक भए । उनलाई कमल ऐरीले कुशल भुर्तेलमार्फत क्याच आउट गराएका थिए ।

कप्तान अमेद फैज ३१ बलमा तीन चौकासहित ३३ रन जोडेर आउट भए । सैद अजिजले १७ रन बनाए । एनलु हाफिज १८ रनबाहेक मलेसियाका कुनै पनि ब्याटरले दोहोरो रन बनाउन सकेनन् ।

एक-एक खेल जितेको मलेसिया र पीएनजीको अंक तालिकामा समान दुई अंक छ । नेट रन रेटका आधारमा अगाडि रहेको पीएननजीले नेपालसँग फाइनलमा प्रतिस्पर्धा गर्ने भएको छ । यसअघि पीएनजी नेपालसँगको दुई खेलमा पराजित भइसकेको छ ।

नेपाल एक खेलअगाडि नै फाइनल पुगिसकेको थियो । फाइनल खेल सोमबार हुनेछ ।