काठमाडौँ । प्रमुख प्रतिपक्ष दल नेकपा एमालेका उपमहासचिव प्रदिप ज्ञवालीले स्थानीय तहको चुनावी गठबन्धनमा जुटेको सत्तारुढ दलभित्रै पहिरो गएको बताएका छन् । निर्वाचनबाट पराजित हुने डरले सत्तारुढ दल आफैं अत्तालिएको अवस्थामा रहेको उनको दाबी रहेको छ ।

नेकपा एमाले चितवन–काठमाडौँ सम्पर्क मञ्चले शनिबार काठमाडौँमा आयोजना गरेको एक कार्यक्रममा बोल्दै उनले स्थानीय तहको निर्वाचनमा सत्तारुढ दल तलसम्मै एकताबद्ध भएर जाने अवस्था नरहेको बताए ।

गठबन्धनका लागि नेपालगञ्जमा जसपाले नमानेको, पर्साका कांग्रेसहरू आफै असहमत रहेको, रोल्पामा हुँदैन भनेर वक्तव्य आउनेवाला रहेको उल्लेख गर्दै उपमहासचिव ज्ञवालीले यस्तो अवस्थामा सत्तारुढ दलहरूलाई बलियो शक्ति मान्ने कुरा भ्रम रहेको उनको जिकिर थियो । उनले सत्तारुढ दलहरू कमजोर रहेकाले अरु दलको सहारा लिन गठबन्धन गर्न बाध्य हुनु परेको तर्क राखेका थिए ।

‘सत्तारुढ पाँच दलीय गठबन्धनले हामीलाई अप्ठयारो पार्छ कि भन्ने खालको जुन मनावैज्ञानिक दबाब सृजना गर्न खोज्या छन्, त्यो भ्रमबाट मुक्त हुन म सबै कमरेडहरुलाई आग्रह गर्दछु,’ उनले भने, ‘पहिलो कुरा, गठबन्धन कुनै शक्तिको, सवलताको, सक्षमताको प्रतीक होइन, यो दुर्बलताको प्रतीक हो, उनीहरूले जतिसुकै प्रयास गरे पनि गठबन्धन तलसम्म एकताबद्ध गरेर लैजाने अवस्था छैन ।’

उपमहासचिव ज्ञवालीले सबै तहको निर्वाचनमा आफ्नो पार्टीले राजनीतिक, नैतिक तथा गणितीय रुपमा जित हासिल गर्ने निश्चित भएको दाबी गरे ।