सिरहा । कोरोना भाइरस (कोभिड–१९) महामारीका कारण पछिल्लो दुई वर्षदेखि हुन नसकेको एसईई परीक्षा यस वर्ष आगमी वैशाख ९ गते शुक्रबारदेखि सञ्चालन हुने भएको छ । यसपालिको एसईई पहिलाकै जस्तो सामान्य अवस्थामा शुरु गर्न लागेको हो ।

एसईई परीक्षामा सिराहा जिल्लाबाट १० हजार ६४० जनासमेत गरी देशभरबाट पाँच लाख १४ हजार ७६० जना छात्र छात्रा सहभागी हुने भएका छन् ।

सिराहा जिल्लामा जम्मा एक सय ६२ विद्यालयका विद्यार्थीको लागि ४० परीक्षा केन्द्रबाट परीक्षा सञ्चालन हुने शिक्षा विकास तथा समन्वय ईकाई सिरहाका प्रमुख रामवृक्ष महतोले जानकारी दिए ।

प्राविधिक धारतर्फका सबै विद्यार्थीको परीक्षा सदरमुकाम सिरहाको बालमन्दिर विद्यालयमा हुने समन्वय इकाई प्रमुख महतोले जनाए ।

अघिल्लो दुई वर्षसम्म ग्रेड वृद्धिको लागि छुट्टै परीक्षा केन्द्र सञ्चालन गरे पनि योपटक सबैलाई एकै ठाउँमा राखेर परीक्षा लिने भएको छ ।