काठमाडौं । सत्तारूढ गठबन्धनका पाँच दलका शीर्ष नेताहरूले महानगरपालिका भागबन्डा गरे पनि उपमहानगरपालिकाबारे गए राति अबेरसम्म छलफल गर्दा पनि सहमति जुटाउन सकेका छैनन्। मंगलबार दुई चरणमा छलफल भएको थियो।

गएराति १ बजेसम्म बालुवाटारमा छलफल चलेको थियो ।

छ महानगरमध्ये नेपाली कांग्रेसले काठमाडौं, ललितपुर र विराटनगरको मेयर लिने भएको छ। यी ठाउँमा उपमेयर अन्य पार्टीबाट हुनेछन्।

बाँकी तीन महानगरमध्ये भरतपुर नेकपा माओवादी केन्द्रलाई, पोखरा नेकपा एकीकृत समाजवादीलाई र वीरगञ्ज जनता समाजवादी पार्टी नेपाललाई दिने सहमति छ। मेयर पाएका दलले उपमेयर फरक दललाई दिने सहमति छ।
सरकारका प्रवक्ता ज्ञानेन्द्रबहादुर कार्कीले महानगर र उपमहानगर भागबन्डाबारे दलहरू सहमति नजिक पुगिसकेको बताए । दलहरूले उपमहानगरबारे आज बिहान ११ बजे फेरि छलफल गर्दैछन्।

११ उपमहानगरमध्ये कांग्रेसले धनगढी, नेपालगञ्ज, तुलसीपुर, बुटवल, कलैया, इटहरी र धरान उपमहानगर पाउने गरी छलफल भएको स्रोत बताउँछ ।

जनकपुर उपमहानगर जसपालाई दिने प्रस्ताव गरिएको छ । तर कांग्रेसले पनि दाबी गरेका छन्। कांग्रेसले वीरगञ्ज महानगर मेयर आफूहरूले छाडेकोले जनकपुरको मेयर पाउनुपर्ने दाबी गरेको छ।

जनकपुर कसले लिने भन्नेमा सहमतिमा गठबन्धन पुग्न सकेको छैन।

नेकपा माओवादी केन्द्रले जितपुर-सिमरा र घोराही पाउनेबारे छलफल भएको छ भने नेकपा एकीकृत समाजवादीले हेटौंडा उपमहानगर पाउने भएको छ।