बागलुङ । अख्तियार दुरुपयोग अनुसन्धान आयोगले घूस रकमसहित प्रहरी नायब निरीक्षकलाई पक्राउ गरेको छ ।

स्थानीयलाई धम्क्याउने, सेवाग्राहीलाई काम मिलाइदिन्छु भन्दै रकम माग्ने गरेका विपत व्यवस्थापन गुल्म बागलुङमा कार्यरत प्रहरी नायब निरीक्षक रुपनारायण महतोलाई अख्तियारको पोखराबाट खटिएको टोलीले रंगेहात ३८ हजार रुपैयाँसहित पक्राउ गरेको हो । मंगलबार बेलुकी पक्राउ परेका महतोलाई अख्तियारले बुधबार सार्वजनिक गरेको हो ।

वागलुङ नगरपालिका २ का जनप्रतिनिधिलाई साक्षी राखेर अख्तियारले ती प्रहरीलाई पक्राउ गरेको अख्तियारका प्रवक्ता श्यामप्रसाद भण्डारीले बुधबार जारी विज्ञप्तिमा उल्लेख छ ।

महतोले लेनदेन मुद्दा मिलाइदिने भन्दै २ जना सेवाग्राहीलाई पैसा मागेपछि उनीहरु अख्तियार पुगेका थिए । घुमुवा प्रहरीको रुपमा समेत काम गरेका महतोले सादा पोसाकमा बजारमा निस्केर सेवाग्राहीलाई सास्ती दिने गरेको गुनासो थियो ।