काठमाडौँ । चन्द्रागिरि नगरपालिका १ स्थित दहचोकमा नबिल बैंकले आफ्नो शाखा विस्तार गरेको छ । योसँगै बैँकको शाखा १४८ तथा एटिएम सेवा १८७ पुगेको छ ।

विं.सं. २०४१ सालमा स्थापना भएको नबिल बैँकले यस वर्ष १५४ शाखा पुर्याउने लक्ष्य राखेको छ । चन्द्रागिरी नगरपालिकाका कार्यकारी अधिकृत निरज पौडेल र बैंकका नायब प्रमुख कार्यकारी अधिकृत सुजित शाक्यले संयुक्त रुपमा शाखा शुभारम्भ उद्घाटन गरेका हुन् ।

समारोहमा बैंकका नायब प्रमुख कार्यकारी अधिकृत शाक्यले स्थानीय समुदायका घर दैलोमा नै बैँकिङ तथा वित्तीय सेवा उपलब्ध गराउन शाखा विस्तार गरिएको जानकारी दिए । उनले भने, ‘विभिन्न बैंक मर्ज गरेर बैंकको सेवालाई अझै विस्तार गर्ने अभियान जारी छ, ‘क्यासलेस’ अवधारणाअनुसार घरमै बसेर नागरिकले सेवा पाउने वातावरण निर्माणमा बैंक लागेको छ, सेवाग्राहीको पहिलो रोजाइको बैँक बनाउने अभियानमा लागेका छौँ ।’

चन्द्रागिरिका प्रमुख प्रशासकीय अधिकृत पौडेलले ३६ हजार घरधुरी र एक लाख ३५ हजार जनसंख्या रहेको नगरमा वित्तीय क्षेत्रको माग बढ्दो क्रममा रहेको बताए । उनले भने, ‘बैँकले गुणस्तरीय वित्तीय सेवा प्रवाह गरेमा सेवाग्राहीको मन जित्न सक्छ, यसका लागि व्यवस्थापन पक्षले ध्यान दिनुपर्छ ।’

कार्यक्रममा बैंकका दहचोक शाखा प्रमुख आश्विन श्रेष्ठले बैंकले सरल र सहज रुपमा सम्पूर्ण बैंकिङ सेवा उपलब्ध गराउने जानकारी दिए ।