काठमाडौँ । प्रधानमन्त्री शेरबहादुर देउवाले पाँच दलीय गठबन्धनका उम्मेदवारलाई मत दिएर जिताउन बुटवलवासीलाई आग्रह गरेका छन् ।

शंका उपशंका नगरी मत दिएर गठबन्धनले उठाएका उम्मेदवारलाई जिताउँदा गठबन्धनको भविष्य लामो हुने बताए । गठबन्धनलाई उनले राष्ट्रिय आवश्यकताको रूपमा अर्थ्याएका छन् ।

‘यो गठबन्धन आवश्यक छ, गठबन्धनको भविष्यका लागि उम्मेदवारलाई जिताउनु आवश्यक छ, संघीयता, गणतन्त्र र लोकतन्त्रलाई स्थायी रूपमा बचाउन गठबन्धन आवश्यक छ,’ देउवाले भने, ‘गठबन्धन दलबीच तालमेल गरेर उम्मेदवारी दिइएको छ, गठबन्धनका सबै साथीलाई शंका उपशंका नगरी जिताउनु पर्छ ।’

देशको स्थायी विकास गर्न, सुकुम्वासीको समस्या समाधान गर्नदेखि राजनीतिक व्यवस्था जोगाउन गठबन्धन बनेको देउवाले प्रष्ट पारे ।

उनले बुटवलवासीलाई नेकपा एमालेका उम्मेदवारलाई मत नदिन आग्रह गरे । उनले भनेका छन्, ‘ओली जीको पार्टीलाई जिताएर के गर्नु हुन्छ ? संसद् विघटन गरेको गरेकै गर्नु भयो, अदालतले न्याय गरेर संसद् पुनःस्थापना गर्‍यो तर चल्न दिएको छैन ।’

देउवाले अमेरिकी सहयोग परियोजना (एमसीसी) अनुदान भएको भन्दै अन्य देशसँग अनुदान सहयोग लिएर देशको विकास गर्न आवश्यक रहेको औँल्याए ।