भरतपुर । स्थानीय तह निर्वाचनमा इमिसेन्टर नै बनेको चितवनको भरतपुर महानगरपालिकाको मतगणना जारी छ । शनिबार विहान सम्मको मतगणनाको ताजा परिणाम अनुसार माओवादी केन्द्रकी उम्मेदवार रेनु दाहाल एमालेका उम्मेदवार विजय सुवेदी भन्दा निक्कै अगाडी बढेकी छिन् ।

भरतपुर महानगरपालिकामा माओवादी उम्मेदवार रेनुले अग्रता फराकिलो बनाउँदै लगेकी छिन् ।

हालसम्म गणना भएको ६९ हजार ६१२ मत मध्ये रेनु दाहालले २७ हजार ७८ मत पाएकी छन्। उनले एमालेका उम्मेदवार विजय सुवेदीलाई ५०१८ मतले पछि पारेकी छन्। सुवेदीले २२०६० मत पाएका छन्।

स्वतन्त्र उम्मेदवार जगन्नाथ पौडेलले ९ हजार ४ सय १४ मत पाएका छन्।

यस्तै उपमेयरमा पनि सत्ता गठबन्धनका उम्मेदवारले फराकिलो अग्रता बनाएका छन्। गठबन्धनबाट साझा उम्मेदवार बनेका नेपाली कांग्रेसका चित्रशेन अधिकारीले २९१३२ मत पाएका छन्। उनलाई एमालेसँग गठबन्धन गरेको राप्रपाका हमिला गुरूङले १७१६६ मतसहित पछ्याइरहेकी छन्।

महानगरको वडानम्बर १३ को अन्तिम नतिजा आएको छ। यहाँ माओवादी केन्द्रका प्रकाश दवाडीले १५४७ मत पाएर विजयी भएका छन्। उनले नेकपा एमालेका शान्तराज आचार्यलाई हराएका हुन्। आचार्यले १२४३ मत पाएका थिए।

यस्तै वडा नम्बर १४ मा नेपाली कांग्रेसका राजेन्द्र खाँखी विजयी भएका छन्। उनले १९११ मत पाउँदा निकटतम् प्रतिद्वन्द्वी नेकपा एमालेका हरिकृष्ण गुरूङले १५७७ मत पाए।

यो सँगै २९ वडा रहेको भरतपुरमा १४ वडाको अन्तिम परिणाम आएको छ। जसमा १, २, ४, ५, ६, ८ र १० नेपाली कांग्रेसले जितेको छ। यस्तै ३, ११ र १२ नेकपा एमालेले जितेको छ भने ७ र ९ नेकपा एकीकृत समाजवादीले जितेको छ।