काठमाडौं । नेकपा एकीकृत समाजवादीले पार्टीभित्रको आन्तरिक भागबण्डा मिलाउन आफ्ना मन्त्रीहरूलाई फिर्ता बोलाएर नयाँ अनुहारलाई सरकारमा पठाउने गरी प्रधानमन्त्री शेरबहादुर देउवालाई नाम सिफारिस गरेपछि राजनीतिमा नयाँ तरंग पैदा भएको छ ।

एकीकृत समाजवादीले सरकारमा सहभागी भएको ८ महिनामै आफ्ना मन्त्रीको पूरै सेटलाई फिर्ता बोलाएर नयाँ सेटलाई मन्त्रीमण्डलमा सहभागी हुन नाम सिफारिस गरेपछि गठबन्धन दलभित्रै पनि मन्त्री फेर्नु पर्ने दबाब बढेको छ ।

पार्टी सचिवालयको बैठक राखेर एकीकृत समाजवादीका अध्यक्ष माधव नेपालले गठबन्धन दलभित्रकै माओवादी केन्द्रका अध्यक्ष प्रचण्डलाई भेटन खुमलटार पुगेका थिए । माधव नेपाल आफ्नै सम्धी सोमप्रसाद पाण्डेलाई साथ लिएर प्रचण्ड भेट्न खुमलटार पुगेका थिए ।

माधव नेपाल र प्रचण्डको भेटवार्ता सकिएलगत्तै मन्त्री फिर्ता बोलाएका विरोध खतिवडा र रामकुमारी झाँक्री पनि प्रचण्ड निवास पुगेका छन् । यो समाचार तयार पार्दासम्म खतिवडा र झाँक्री प्रचण्ड निवासमा छन् । चुनावको मुखमा पनि भागवण्डा पुर्‍याउन नै मन्त्री हेरफेरको निर्णय लिएको भन्दै एकीकृत समाजवादीको निर्णयको राजनीतिक वृतमा राम्रो नभएको टिप्पणी भइरहेको बेला झाँक्री र खतिवडा भने सकेसम्म आफूहरुको बचाउका लागि प्रचण्ड निवासमा पुगेको बताइएको छ ।

बजेटमा मन्त्रालयगत छलफलसमेत सोमबारबाट मात्र शुरु हुन लागेका बेला एकाएक मन्त्री फेर्ने पार्टी निर्णयमा फिर्ता बोलाइएका एकीकृत समाजवादीका मन्त्रीहरु खुसी छैनन् ।

एकीकृत समाजवादीको यो निर्णयले कांग्रेसभित्र पनि गठबन्धन फेर्न दबाब बढेको छ । माओवादी केन्द्रमा पनि बहस शुरु भएको छ । जसपामा उस्तै बहस शुरु भएको छ । जसपा अध्यक्ष उपेन्द्र यादवले त एकीकृत समाजवादीले मन्त्रीको नयाँ नाम प्रधानमन्त्रीलाई बुझाएसँगै प्रधानमन्त्रीलाई भेटेर छलफल गरेका छन् ।