धनगढी । कैलालीमा भोलि हुने जिल्ला समन्वय समिति (जिसस)को निर्वाचनका लागि सबै तयारी पूरा भएको जिल्ला निर्वाचन कार्यालय कैलालीले जनाएको छ ।

कूल १३ पालिका रहेको कैलालीमा जिससको नेतृत्वका लागि २७ मत आवश्यक पर्ने छ । तर, कैलालीमा जितका लागि कसैसँग पर्याप्त मत नपुग्ने भएको छ ।

जिससको नेतृत्वका लागि कैलालीमा नेपाली कांग्रेस, नेकपा माओवादी केन्द्र, एकीकृत समाजवादी पार्टी र नागरिक उन्मुक्ति पार्टी तथा एमालेबीच गठबन्धन भएको छ ।

कैलालीमा कांग्रेस, माओवादी र नेकपा एस मिल्दा १३ मत पाउने स्थिति रहेको छ । एमाले र उन्मुक्ति पार्टी मिल्दा १२ मत पाइने स्थिति छ ।

तर, कैलालीको मोहन्याल गाउँपालिकाका निर्वाचित अध्यक्षलाई निर्वाचन आयोगले मताधिकारको प्रयोग गर्नबाट वञ्चित हुने गरी आइतबार मात्रै निर्देशनसहितको पत्र पठाएको छ ।

माओवादी केन्द्रबाट निर्वाचित मोहन्याल गाउँपालिकाका अध्यक्ष देवीदत्त उपाध्यायका नाममा अख्तियार दुरुपयोग अनुसन्धान आयोगमा उजुरी परेको थियो । अख्तियार दुरुपयोग अनुसन्धान आयोगले उपाध्याय भ्रष्टाचार मुद्दामा छानबिनको सूचीमा परेका भन्दै उनलाई जनप्रतिनिधिको हैसियतमा नराख्न निर्वाचन आयोगलाई पत्र पठाएको थियो ।

उपाध्याय निलम्बनमा परेसँगै कैलालीमा कांग्रेस, माओवादी केन्द्र र एकीकृत समाजवादी पार्टीको मत भार १२ हुने छ । उता नागरिक उन्मुक्ति पार्टी र एमालेको मतभार पनि १२ नै रहेको छ ।

यस्तो अवस्थामा कैलालीमा स्वतन्त्र रूपमा निर्वाचन जितेका धनगढी उपमहानगरका मेयर गोपाल हमाल निर्णायक बन्ने देखिएका छन् । तर, मेयर हमालले अहिलेसम्म कसलाई समर्थन गर्ने भनेर कुनै निर्णय नगरेको बताए ।

‘म अहिलेसम्म स्वतन्त्रकै हैसियतमा रहेको छु,’ उनले भने, ‘के गर्ने भन्ने कुरोको टुंगो भोलि नै लाग्ने छ ।’

कैलालीमा कांग्रेससँग ९, नागरिक उन्मुक्ति पार्टीसँग ७, नेकपा एमालेसँग ५, माओवादी केन्द्रसँग २, नेकपा एकीकृत समाजवादी पार्टीसँग १ र स्वतन्त्र १ मत रहेको छ ।

जिससका लागि कसैको बहुमत नपुग्ने अवस्था आएका गोलाप्रथा विधिबाट जिसस प्रमुखको टुंगो लगाइने उनले बताए ।