काठमाडौँ । गएरातिको अविरल वर्षापछि सेती नदीमा आएको बाढीबाट पोखरा महानगरका दुई वडा जोड्ने पक्की मोटरेवल पुलमा क्षति भएको छ । पोखरा २५ हेमजा र वडा नं १९ पुरुनचौर जोड्ने गरी मर्दीदोभानभन्दा केही तल सेती नदीमाथि बनाइएको ट्रष्ट पुलमा बाढीले क्षति पुर्‍याएपछि यातायात आवागमन बन्द भएको छ ।

पुलको जगभन्दा तलबाटै नदीले कटान गरेपछि पिल्लर कोल्टिएर ट्रष्ट पुल पूर्ण रुपमा क्षति भएको र सञ्चालनमा आउन नसक्ने डिभिजन सडक कार्यालय पोखराले जनाएको छ । पुलबाट अब मानिस हिँडडुल गर्नसमेत जोखिम भएको बताइन्छ । पुलका संरचना अन्यत्र स्थानान्तरण गर्नु पर्ने देखिएको छ ।

सडक कार्यालयले पाँच वर्षअघि निर्माण गरेको सो पुल ७२ मिटर लामो र सात मिटर फराकिलो छ । पुलको पुरुनचौरपट्टीको क्षेत्रमा पिल्लरसँगैको एप्रोज दुई मिटरजति नदीले बगाएको छ ।

बाढीले पुलको पिल्लरसँगै मुख्य जीपमा पनि क्षति पुर्‍याएको पोखरा महानगर १९ का वडाध्यक्ष पुष्पेन्द्र पाण्डेले बताए । पुलको मुख्य संरचनामा बाढीले क्षति पुर्या‍एकाले ठूलो क्षति पुगेको उनले भनाए छ । पुल अवरुद्ध भएपछि साना ठूला सबै सवारीका साधन आवतजावत रोकिएको छ । सोही पुल हुँदै माछापुच्छ्रे गाउँपालिकाका केही वडाका नागरिकसमेत पोखरा आवतजावत गर्ने गर्दछन् ।