काठमाडौं । सरकारले लामो समय देखि विवादका रुपमा रहेको अमेरीकाकाे स्टेट पार्टनरसिप प्रोग्राम (एसपीपी) अस्वीकृत गर्ने निर्णय गरेको छ ।

सोमबार प्रधानमन्त्री निवास बालुवाटारमा बसेको मन्त्रीपरीषद वैठकले एसपीपीलाई सधैंका लागि अस्विकार गर्ने निर्णय गरेको हो । सरकारले गरेको उक्त निर्णय अमेरिकी सरकारलाई समेत लिखितरुपमै जानकारी गराउने निर्णय भएको बैठकमा सहभागी एक मन्त्रीले बताए ।

एसपिपी सम्झौता गर्न लागिएको भन्दै सरकारको चर्को आलोचना भइरहेको थियो । प्रधानमन्त्री शेरबहादुर देउवाको आसन्न अमेरिका भ्रमणका क्रममा एसपिपी सम्झौतामा हस्ताक्षर हुनसक्ने आशंका व्यक्त भइरहँदा सरकारले अस्वीकृत गर्ने पत्र लेख्ने निर्णय गरेको हो । प्रमुख प्रतिपक्ष नेकपा एमालेसहित सत्ता गठबन्धनका वामपन्थीसहितका दलले एसपिपी अस्वीकार गर्न दबाब दिएका थिए । 

तत्कालीन प्रधान सेनापति राजेन्द्र क्षत्रीले एसपिपीमा सहभागिताका लागि ०७२ कात्तिक १० मा अमेरिकी दूतावासलाई पठाएको पत्र सार्वजनिक भइसकेको छ । त्यसबेला केपी ओली प्रधानमन्त्री थिए । सेनाले सरकारको अनुमतिमा पत्र लेखेको बताए पनि ओलीले आफुलाई जानकारी समेत हुन नसकेको बताउँदै आएका थिए ।