काठमाडौं । जनार्दन शर्मामाथिको छानबिन नसकिएसम्म नेकपा (माओवादी केन्द्र)ले अर्को अर्थमन्त्री नबनाउने भएको छ । अनधिकृत मानिसलाई अर्थ मन्त्रालयमा बोलाएर करका दर हेरफेर गरेको आरोप लागेका शर्माले अर्थमन्त्रीबाट राजीनामा दिएसँगै माओवादी केन्द्रले छानविन नसकिएसम्म अर्को अर्थमन्त्री नबनाउने जनाएको हो ।

संसद भवनमा संवाददाताहरूसँग कुरा गर्दै माओवादी नेता वर्षमान पुनले शर्माले राजीनामा दिएर उच्च नैतिकता प्रदर्शन गरेको बताए।

‘पार्टीले उहाँलाई राजीनामा दिन सुझाव दिएको थियो, अनिवार्य भनेको थिएन,’ पुनले भने,‘उहाँले राजीनामा दिएर उच्च नैतिकता प्रदर्शन गर्नुभयो। छानबिन नसकिएसम्म पार्टीले अरूलाई अर्थमन्त्री बनाउँदैन।’ छानबिनमा शर्मा निर्दोष सावित भएपछि उनी नै अर्थमन्त्री बन्ने पुनले बताए

शर्मामात्री आर्थिक वर्ष २०७९/०८० को बजेट बनाउँदा अनधिकृत मानिसलाई अर्थ मन्त्रालयमा बोलाएर करका दर हेरफेर गरेको आरोप छ । सो आरोप लागेसँगै उनले बुधबार संसदमा राजीनामा घोषणा गरेका छन् । उनीमाथि छानबिन गर्न संसदले ११ सदस्यीय विशेष समिति बनाएको छ।