काठमाडौँ । लगातारको वर्षसँगै दोलखाको जिरी नगरपालिकाको ४१ घर उच्च जोखिममा परेको छ । जिरी नगरपालिकामा बुधबारदेखि निरन्तर भारी वर्षासँगै विभिन्न ठाउँमा पहिरो जाँदा जोखिम बढेको हो ।

जिरी नगरपालिका ६ हाटडाँडा बजार क्षेत्रमा वर्षसँगै बुधबार दिउँसो पहिरो जाँदा १४ घर परिवार विस्थापित भएको नगरपालिकाका प्रमुख मित्र जिरेलले बताए ।

पहिराले घर बगाउने जोखिम बढेपछि विस्थापित परिवार स्थानीय आफन्त तथा छिमेकीको घरमा आश्रय दिएर बसेका छन् । विस्थापित भएका परिवारलाई तत्कालका लागि जिरी नगरपालिकाले त्रिपाल र खाद्यान्नका सामग्री वितरण गरिएको नगर प्रमुख जिरेलले बताए ।

हाटडाँडामा गएको पहिरोले १४ घरपरिवार विस्थापित भएका छन् भने पालिकाका विभिन्न क्षेत्रमा गरी ४१ घरपरिवार पहिराको जोखिममा परेका छन् । नगरपालिका खरोयो वन, कोथामेलगायत स्थानका स्थानीयलाई सुरक्षित स्थानमा सार्ने काम भइरहेको उनले बताए ।

त्यसैगरी जिल्लाको मेलुङ गाउँपालिकामा पनि पहिरोको उच्च जोखिम बढेको छ । मेलुङ गाउँपालिका ७ को जोगीगाउँ, थामी बस्ती, मगर गाउँलगायत स्थान पहिरोको उच्च जोखिममा रहेको वडाध्यक्ष नवराज खड्काले बताए ।

मेलुङ ७ मा गएराति पहिरोले दुई घरमा क्षति पुगेको छ । उक्त वडामा पहिराका कारण हालसम्म ११ घरमा आंशिक क्षति पुर्याएको र २३ घर उच्च जोखिममा रहेको वडाध्यक्ष खड्काले बताए ।