काठमाडौं । संघीय संसद (प्रतिनिधि सभा)ले साढे दुई वर्षपछि आज उपसभामुख पद पाउने भएको छ ।

२०७६ साल माघ ६ गते तत्कालीन उपसभामुख शिवमाया तुम्बाहाम्फेले राजीनामा दिएपछि अहिलेसम्म खाली रहेको यो पदमा आज निर्वाचन हुँदैछ ।उपसभामुख छान्न शुक्रबार दिउँसो ३ बजे बस्ने संसद बैठकमा मतदान प्रक्रिया हुने कार्यसूची रहेको छ। निर्वाचनका लागि बिहीबार नै उम्मेदवारी दर्ता भई अन्तिम नामावलीसमेत प्रकाशित भइसकेको छ ।

उपसभामुखका लागि नेपाली कांग्रेसकी पुष्पा भुसाल र नेकपा एमालकी विद्या भट्टराई उम्मेदवार छन् ।

पाँच दलीय सत्ता गठबन्धनका तर्फबाट कांग्रेस सचेतकसमेत रहेकी भुसालले नेकपा माओवादी केन्द्रका देवप्रसाद गुरूङ प्रस्तावक र एकीकृत समाजवादीकी लक्ष्मीकुमारी चौधरीको समर्थनमा मनोनयन दर्ता गराएकी छन्। भुसाल यसअघि पनि उपसभामुख उम्मेदवार भएर पराजित भएकी थिइन्। २०७४ चैतमा भएको चुनावमा भुसाललाई एमालेकी शिवमाया तुम्बाहाङ्फेले हराएकी थिइन् ।
शान्ता चौधरीको प्रस्ताव र कृष्णभक्त पोखरेलको समर्थनमा उम्मेदवारी दर्ता गराएकी भट्टराई प्रतिनिधि सभा उपनिर्वाचनमा कास्की २ बाट निर्वाचित एमाले सांसद हुन्।
हाल प्रतिनिधि सभामा एमालेको ९८ जना सांसद छन् । कांग्रेसको जम्मा सासंद ६३ जना तर २ जना निलम्बित हुदाँ हाल ६१ सांसद, माओवादी केन्द्रका ४९ जना (सभामुखसहित) , नेकपा एकीकृत समाजवादीका २३, जसपाका २१ (२ जना निलम्बितले मतदान गर्न पाउँदैनन), लोसपाका १३, राष्टिय जनमोर्चाका १, राप्रपाका १, नेमकिपाका १ र स्वतन्त्र १ सांसद अहिले संसदमा छन् ।
यसमा पनि एमालेको ९८ मा सोमप्रसाद पाण्डे अहिले नेकपा एकीकृत समाजवादीतिर छन् । जसले गर्दा एमालेमा ९७ र एकीकृत समाजवादीमा २४ मत छ । माओवादीका ४९ मध्ये सभामुखले मत दिँदैनन । तर स्वतन्त्रका १ माओवादीतिरै रहेकोले त्यो सहित जोडदा भने ४९ मत नै हुन्छ ।

तत्कालीन उपसभामुख शिवमाया तुम्बाहाङ्फेले ६ माघ २०७६ मा राजीनामा दिएपछि संसद्ले उपसभामुख पाएको छैन। संविधानमा सभामुख र उपसभामुख फरक दल र लिंगको हुनुपर्ने प्रावधान छ।