काठमाडौँ । सय जनाभन्दा बढी विवाहका पाहुना बोकेको डुंगा रहिम यार खान शहर नजिक सिन्धु नदीमा डुब्दा २३ जनाको मृत्यु भएको छ । घटनामा २६ जना बेपत्ता भएका छन् ।

राज्य सञ्चालित उद्धार सेवाका ३५ जना गोताखोर खोजी तथा उद्धारमा खटिएका र उनीले ९० जनालाई उद्धार गरेका सरकारी अधिकारीले बताएका छन् । क्षमताभन्दा बढी यात्री बोकेकाले डुंगा डुबेको अनुमान गरिएको छ ।

दुर्घटनामा ज्यान गुमाउने अधिकांशमा महिला छन् । आपत्काल व्यवस्थापन प्राधिकरणका अनुसार १९ जना महिलाको शव नदीबाट निकालिएको छ । डुंगामा धैरे महिला र बालबालिका सवार थिए ।

गत साता सरकारले निरन्तर वर्षा भइरहेकाले नदीतटमा नजान सर्वसाधारणलाई आग्रह गरेको थियो ।