काठमाडौं । राजधानीको तारकेश्वर नगरपालिका२ स्थित काभ्रेस्थलीको एकै परिवारका ३ जनाको हत्या र एक जनाले आत्महत्या गरेको आशंका गरिएको छ । तारकेश्वर नगरपालिका २को वडा सदस्य किशोर भण्डारीका अनुसार परिवारका ३ जनाको हत्या गरेर केशव पाण्डेले आत्महत्या गरेको आशंका गरिएको हो ।

सोमबार बिहान कोही नउठेपछि छिमेकीले ढोका फुटाएर हेर्दा केशव पाण्डे र उनकी पत्नी सुनितासहित छोराछोरी मृत भेटिएका थिए । ति वडासदस्य भण्डारीका अनुसार घटनाको प्रकृति हेर्दा केशवले पत्नी सुनिता काफ्ले पाण्डे, छोरी आशिका र छोरा आशिकको हत्या गरेर आफूले आत्महत्या गरेको जस्तो देखिएको बताए ।

उनले मेरोन्यूजसँग भने, ‘परिवार सखाप पारेर केशवले आत्महत्या गरेको जस्तो छ। थप जानकारी भने प्रहरी अनुसन्धानबाट पुष्टि हुनेछ।’ उपत्यका अपराध अनुसन्धानले समेत परिवारका सदस्यको हत्या गरेपछि आफूले आत्महत्या गरेको आशंका गरेका छन् ।