काठमाडौँ । आईएमई लाइफ इन्स्योरेन्सले स्थापनाको पाँचौ वर्ष पूरा गरेको उपलक्ष्यमा सबै प्रदेशमा मंगलबार वृहत स्वास्थ्य शिविर कार्यक्रम सञ्चालन गरेको छ । स्वास्थ्य शिविरबाट १३ सय २ जना सर्वसाधारणले स्वास्थ्य जाँच गराई लाभान्वित भएका छन् ।

इन्स्योरेन्सका प्रमुख कार्यकारी अधिकृत कवि फुयाँलका अनुसार पाँचौ वर्ष पूरा भएको अवसरमा सामाजिक उत्तरदायित्वको भावना बहन गर्दै सात वटा प्रदेशका विभिन्न आठ स्थानमा वृहत स्वास्थ्य शिविर कार्यक्रम गरिएको हो ।

प्रदेश १ मा सुनसरी चक्रघट्टीमा आँखा शिविर कार्यक्रम गरिएको थियो । त्यस्तै, मधेश प्रदेशमा बारा, कलैयामा दन्त शिविर सञ्चालन गरिएको थियो । बागमती प्रदेशमा चितवन, नारायणघाटमा पाठेघरको मुखको क्यान्सर शिविर कार्यक्रम गरिएको थियो । उक्त शिविरमा विपी कोइराला मेमोरियल क्यान्सर अस्पतालको सहकार्यमा शिविर कार्यक्रम आयोजना गरिएको थियो ।

त्यस्तै, गण्डकी प्रदेशमा लमजुङको सोती पसलमा जनरल स्वास्थ्य जाँच शिविर सञ्चालन गरिएको छ । लुम्बिनी प्रदेशमा गुल्मी र बाँकेको राप्ती सोनारीमा आँखा शिविर सञ्चालन गरिएको छ । कर्णाली प्रदेशमा सुर्खेतको गुमीमा महिला स्वास्थ्य शिविर सञ्चालन गरिएको छ । सुदूरपश्चिम प्रदेशमा कैलालीस्थित टीकापुर नारायणपुरमा पनि जनरल स्वास्थ्य जाँच शिविर संचालन गरिएको छ ।

यसअघि गत शुक्रबार मुलुकभर गरिएको रक्तदान कार्यक्रममा ५७१ जनाले रक्तदान गरेका थिए । त्यस्तै, शनिबार गरिएको अभिकर्ता तालिममा सहभागी ७४८ जनालाई तालिम दिई प्रमाण पत्र वितरण गरिएको थियो । ०७४ भदौ १ गतेदेखि कारोबार सञ्चालनमा आएको आईएमई लाइफ इन्स्योरेन्सले सुरक्षा, बचत तथा लगानीलगायतका ग्राहक वर्गका विभिन्न आवश्यकतासँग सम्बन्धित विविध व्यक्तिगत तथा सामूहिक बीमा योजना प्रदान गर्दै आइरहेको छ ।

जीवन बीमाबारेमा जनचेतना वृद्धि गर्ने, जीवन बीमा सुविधाहरुको माध्यमबाट ग्राहकहरुको वित्तीय सुरक्षालाई बढावा दिने तथा राष्ट्रको विकासमा योगदान दिने परिकल्पनाका साथ इन्स्योरेन्स सञ्चालनमा आएको कम्पनीले जनाएको छ ।