काठमाडौँ । प्रधानमन्त्री शेरबहादुर देउवाले विश्व विद्यालयहरूले विश्व बजारमा प्रतिस्पर्धा गर्न सक्ने जनशक्ति उत्पादनमा जोड दिनु पर्ने बताएका छन् ।

बिहीबार काठमाडौँमा नेपाल प्राध्यापक संघले आयोजना गरेको ‘६० औँ वार्षिक दिवस÷हीरक महोत्सव’ तथा ‘नेपालमा उच्च शिक्षा अवस्था र चुनौती विषयक गोष्ठी’मा बोल्दै उनले विश्व विद्यालयले विश्व बजारमा प्रतिस्पर्धा गर्न सक्ने शैक्षिक जनशक्ति उत्पादन गर्नु पर्र्ने बताएका हुन् । उनले कुनै देशको विकास त्यस देशको शिक्षाको गुणस्तरले मापन गर्ने बताए ।

‘विश्व विद्यालयका समस्या, चुनौतीहरूलाई आपसी संवाद र समस्याको समाधान गर्ने कुरामा जोड दिन चाहन्छु, यसमा प्राध्यापक संघको पनि आवश्यक भूमिकाको अपेक्षा गर्दछु, कुनै पनि मुलकको विकास त्यस देशको शिक्षाको गुणस्तरले मापन गर्दछ,’ उनले भने, ‘विश्व विद्यालयहरूले राष्ट्रिय, अन्तर्राष्ट्रिय क्षेत्रमा विकास भइरहेको नयाँ ज्ञान र प्रविधिलाई आफ्नो पाठ्यक्रममा समावेश गरी विश्व बजारमा प्रतिस्पर्धा गर्न सक्ने शैक्षिक जनशक्ति उत्पादनमा जोड दिनु पर्दछ ।’

उनले विश्व विद्यालयहरूको शैक्षिक गुणस्तरलाई प्रतिस्पर्धी बनाउन प्राध्यापक प्रयत्नशील हुनु आवश्यक रहेको उल्लेख गरे । उनले उच्च शिक्षालाई अनुसन्धानमूलक, जीवनोपयोगी, रोजगारमूलक बनाउनु पर्नेमा जोड दिए ।