काठमाडौँ । महाभियोग सिफारिस समितिमा जवाफ दिन पुगेका निलम्बित प्रधानन्यायाधीश चोलेन्द्र शमशेर जबराको शैली रवाफिलो देखिएको छ । दोस्रो दिन आजको बैठकमा जबराले आफूमाथि पूर्वाग्रही ढंगले महाभियोग आएको जिकिर गरे । उनले समिति र नेपाल बार एशोसियसनमाथि नै प्रश्न उठाए ।

‘न्याय सम्पादनमा अवरोध गरिस् मात्रै भनेर महाभियोगसम्बन्धी ऐनको व्यवस्था पुष्टि हुन्छ र ? यो एकदमै अनुचित र पूर्वाग्रही हो,’ जबराले भनेका थिए, ‘बरु महाभियोग साथै पुष्टि हुने प्रमाण पठाएको भए हुने ।’

‘यो कस्तो प्रकारको महाभियोग पत्र हो ? के यसले नियन्त्रण र सन्तुलनको सिद्धान्तलाई साथ दियो त ?’ उनले ठोस प्रश्नहरू जवाफ दिएनन् । उनले सैद्धान्तिक कुरामै महाभियोग सिफारिस समिति अल्झेको दाबी गर्न भ्याए ।

जबराले उत्तर दिनु पर्नेमा प्रश्नहरू सोधे । भने, ‘न्यायालयले चेक एन्ड ब्यालेन्स गर्नुपर्ने, संसदले चाहिँ गर्नु नपर्ने ?’ उनले प्रधानन्यायाधीशलाई ६ महिना निलम्बनमा राखिएको आरोप लगाए ।

उनले आफू पनि नेपाल बार एसोसियसनको सदस्य रहेको बताउँदै यसले बाटो बिराएको आरोप लगाए । उनले न्यायिक संरचनासँगै बारलाई पनि राखेर पुनसंरचना गर्नु पर्ने बेला आएको बताए ।