काठमाडौँ । नेकपा एमालेका सांसद देवेन्द्र दाहालले नागरिकतासम्बन्धी विधेयकलाई सहमतिको आधारमा पारित गर्नु पर्ने बताएका छन् । बिहीबार राष्ट्रियसभाको दोस्रो बैठकमा बोल्दै उनले यस्तो बताएका हुन् ।

राष्ट्रपतिबाट पुनर्विचारका लागि फिर्ता भई प्रतिनिधिसभाबाट सन्देशसहित प्राप्त नेपाल नागरिकता (पहिलो संशोधन) विधेयक, २०७९ सम्बन्धी विधायन व्यवस्थापन समितिको प्रतिवेदनमाथिको छलफलमा भाग लिँदै उनले सहमतिमा पारित गर्नु पर्ने बताएका हुन् ।

उनले विधेयकमाथि आफ्नो पार्टीको फरक मत रहेको उल्लेख गर्दै सम्बोधन गरिनु पर्ने बताए । उनले विधेयकलाई सहमतिको दस्तावेजको रुपमा पारित गरिनु पर्ने बताएका थिए ।

‘यो विधेयक हाम्रो अगाडि प्रस्तुत भएको छ, विधायन व्यवस्थापन समितिमा छलफल भएको छ, विधायन व्यवस्थापन समितिमा छलफल भएर हामीले फरक मत राखेका छौँ,’ उनले भने ।

उनले विधेयकलाई विधायन व्यवस्थापन समितिमा बहुमतले पारित गरेको उल्लेख गर्दै समितिमा पनि आफूहरुले गम्भिर असहमति राखेको स्पष्ट पारेका थिए । उनले नागरिकता विधेयकमाथि सत्ता पक्षले भोटको राजनीति गरेको आरोप लगाए ।