काठमाडौँ । भारतको मध्य प्रदेश राज्यको एउटा पटाका गोदाममा आज भएको विस्फोटमा एक बालक, एक महिला र एक पुरुषसहित तीन जनाको मृत्यु भएको छ । घटनामा अन्य धेरै घाइते भएको स्थानीय प्रहरीले जनाएको छ ।

राज्यको मोरेना जिल्लामा उक्त दुर्घटना भएको तथा सात जना घाइतेलाई स्थानीय अस्पतालमा भर्ना गरिएको छ । विष्फोटले भवन भत्किँदा धेरै जना भग्नावशेषमा फसेका थिए ।

यही कात्तिक ७ गते भारतभर मनाइने दिवाली पर्वका लागि बनाइएका पटाका गोदाममा भारी मात्रामा भण्डार गरिएको थियो । प्रहरीका अनुसार तीन जनाको शव फेला परेको छ ।

यद्यपि, उनीहरूको परिचय खुल्न बाँकी छ । भग्नावशेषमा अझै धेरै मानिस फसेका हुनसक्ने जनाउँदै प्रहरी खोज तथा उद्धार जारी रहेको बताएको छ ।