काठमाडौँ । बैंक अफ काठमाण्डू लिमिटेडअन्तर्गत क्यापिटल मार्केट लि.को साधारणसभा सम्पन्न भएको छ । कम्पनीको आज साधारणसभा सम्पन्न भएको हो ।

यस कम्पनीका अध्यक्ष महेश मिश्रको अध्यक्षतामा बसेको सातौँ वार्षिक साधारणसभाले आ.व. २०७८-७९ को वित्तीय विवरण परित गर्नुका साथै आ.व. २०७८-७९ मा सञ्चित मुनाफाबाट ५.७९ प्रतिशत लाभांश (करसमेत) वितरण गर्ने निर्णय अनुमोदन गर्नुका सथै आगामी आ.ब. २०७९-८० को बाह्य लेखा परीक्षक नियुक्त गर्ने निर्णय भएको छ ।

बैंक अफ काठमाण्डूको सहायक कम्पनी बि.ओ.के. क्यापिटल मार्केट लि., कम्पनी ऐन, २०६३ बमोजिम विधिवत दर्ता भई विगत सात वर्षदेखि उत्कृष्ट सेवा प्रदान गर्दै आएको छ । कम्पनीले समीक्षा अवधिमा छ वटा कम्पनीको प्राथमिक शेयर तथा हकप्रद शेयर निष्काशन तथा बिक्री प्रबन्धसम्बन्धी कार्य गर्नका लागि सम्झौता पत्रमा हस्ताक्षर गरेको छ । जम्मा ११ वटा कम्पनीको शेयर रजिष्ट्रारसम्बन्धी कार्य गरिरहेको छ ।

यस कम्पनीले हालसम्म जम्मा ८५ हजार ६८९ हितग्राही खाता खोलिसकेको छ । लगानी व्यवस्थापन सेवा अन्र्तगत ९८ जना को १७ करोड बराबरको लगानी व्यवस्थापन गरिएको छ । मूल्य अभिवृद्धि र बढ्दो ब्याजदरले शेयर बजारमा समेत ४० प्रतिशतभन्दा बढी गिरावट आएकोे अवस्थामा कम्पनीले सुझबुझका साथ कार्य सम्पादन गर्दै आएको छ ।