काठमाडौं । प्रतिनिधिसभामा प्रत्यक्ष तर्फको २५ सिटको नतिजा आउन बाँकी रहँदा समानुपातिक तर्फको अव कुन दलका कुन सांसद छानिन सक्छन् ? भन्ने पारम्भिक चित्र देखिन थालेको छ । निर्वाचन आयोगले समानुपातिक तर्फको मतगणना जारी राखेकै बेला एमाले समानुपातिकतर्फ ठूलो दलका रुपमा देखा परिरहेको छ । दोस्रोमा कांग्रेस छ ।

निर्वाचन आयोगले अहिलेसम्म गणना गरेको समानुपातिक तर्फको मत गणनाका आधारमा, पारम्भिक प्रक्षेपणअनुसार समानुपातिकमा एमालेले ३४, कांग्रेसले ३४, माओवादीले १५, राष्ट्रिय स्वतन्त्र पार्टीले १५, राप्रपाले आठ र जसपा थ्रेस होल्ड कटाएर चार सिट पाउने सम्भावना देखिएको छ ।

समानुपातिकमा कुल ११० सिट हुन्छ ।

दलहरुले प्रत्यक्षतर्फ महिला जितेको संख्याका आधारमा अनिबार्य ३३ प्रतिशत महिलाको सहभागिता सुनिश्चित गराउनु पर्ने भएकोले समानुपातिकमा छानिनेमा अधिकाशं महिला पर्ने देखिएको छ । यसरी हेर्दा कुलमा ७२ जना महिला दलहरुले समानुपातिकबाटै छान्नुपर्ने पारम्भिक परिणामबाट देखिएको छ ।

प्रतिनिधिसभा सदस्य समानुपातिक निर्वाचन निर्देशिका, २०७९ ले खस–आर्य ३१.२ प्रतिशत , मधेसी १५.३ प्रतिशत, आदिवासी जनजाति २८.७ प्रतिशत, दलित १३.८ प्रतिशत, थारू ६.६ प्रतिशत, मुस्लिम ४.४ प्रतिशत, पिछडिएको क्षेत्र ४.३ प्रतिशत हुनुपर्ने व्यवस्था गरेको छ ।

यस आधारमा कांग्रेसले समानुपातिकतर्फ प्रायः सवैं महिला पठाउनु पर्ने देखिएको छ । क्लष्टर मिलाएर महिला सहभागिता गराउनुपर्दा कांग्रेसबाट प्रधानमन्त्री पत्नी डा आरजु राणा देउवा देखि गृहमन्त्रीका पत्नी मञ्जु खाँण सम्म छानिने चित्र देखिएको छ ।

कांग्रेसले दलित क्लस्टरबाट शान्ति विक, रूपा विक, सीता मिजार र आशा विक, आदिवासी जनजाति क्लस्टरबाट सरस्वती बजिमय, लीलादेवी वोखिम ९लिम्बू०, सीताकुमारी राना, सुशीला थिङ, सपना राजभण्डारी जोशी, माया राई, कुसुम थापामगर र मनोरमा शेरचनलाई समानुपातिक सांसदका रुपमा छान्नुपर्ने अवस्था देखिएको छ ।

त्यस्तै, खस–आर्यबाट अम्बिका बस्नेत, सरिता प्रसाईं, आरजु राणा देउवा, ईश्वरी न्यौपाने, प्रतिमा गौतम, मञ्जु खाण, रमा कोइराला पौड्याल, कान्तिका सेजुवाल र मैना रावल कार्की संसद्मा प्रवेश गर्ने सम्भावना बढेर गएको छ ।

थारू क्लस्टरबाट कल्पना चौधरी र विनाकुमारी थनेत, मधेसी क्लस्टरबाट नगिना यादव, मुक्ताकुमारी यादव, चन्दा चौधरी र संगीता मण्डल तथा मुस्लिमबाट जावेदा खातुन जागा र देवकला सुवेदी कमाल संसद् प्रवेश गर्ने देखिन्छ ।

यसबाहेकका बाँकी चारजना पुरुष पनि समानुपातिकबाट छानिने देखिन्छन् । खस–आर्यतर्फबाट डा प्रकाशरण महत, आदिवासी जनजाति क्लस्टरबाट गोपालमान श्रेष्ठ, दलिततर्फ जीवन परियार, मधेसीतर्फ विमलेन्द्र निधि र थारू क्लस्टरमा योगेन्द्र चौधरीको नाम पहिलो नम्बरमा छ ।

उनीहरुबाटै कांग्रेसले महिलाको कोटा पूरा गरेर समानुपातिकतर्फ छान्न सक्ने देखिन्छ । कांग्रेसको वन्दसूचीमा रहेका अन्य नेताहरु भने समानुपातिकतर्फ पर्ने सम्भावना न्यून देखिएको छ ।