कामठाडौँ । राष्ट्रिय स्वतन्त्र पार्टीका सभापति रवि लामिछानेको नागरिकता विवादमाथि प्रहरीले अनुसन्धान थालेको छ । चितवन २ बाट प्रतिनिधिसभा सदस्यमा निर्वाचित भएका उनको नागरिकताबारे विवाद हुँदै आएको थियो ।

जिल्ला प्रशासन कार्यालय काठमाडौँले प्रहरीलाई पत्र पठाएर अनुसन्धान गर्न भनेसँगै प्रहरीले अनुसन्धान सुरू गरेको जिल्ला प्रहरी परिसर काठमाडौँले जनाएको हो ।

लामिछानेमाथि अमेरिकी नागरिकता लिँदा नेपाली नागरिकता खारेज नगरेको र पुनः अमेरिकी नागरिकता त्याग गरेपछि पुरानै नेपाली नागरिकताको प्रयोग गरेको आरोप छ ।

उकेरा डटकमका अनुसार लामिछानेले सम्पन्न भएको निर्वाचनमा ०५० सालमा प्राप्त गरेको नागरिकता प्रयोग गरेका छन् । लामिछानेले मंसिर ४ को चुनावमा पुरानै नागरिकताको प्रयोग गरी उम्मेदवारी दिएका थिए ।

यस विषयमा लामिछानेविरुद्ध निर्वाचन आयोग र गृह मन्त्रालयमा उजुरी परेको थियो ।
उक्त उजुरी परेपछि गृहबाट काठमाडौँ प्रशासनमा पत्राचार गरिएको थियो । प्रशासनले यसमा छानबिन गर्न परिसरलाई पत्र पठाएको हो ।

विदेशी नागरिकता त्याग्नुभन्दा पहिलै नेपाली राहदानी लिएको अनुसन्धानबाट देखिए लामिछानेविरुद्ध जरिवाना र कैद सजाय हुन सक्छ । उनीविरुद्ध दुई लाखदेखि पाँच लाख रूपैयाँसम्म जरिवाना वा एक वर्षदेखि ३ वर्षसम्म कैद सजाय वा दुवै सजाय हुने कानुनी व्यवस्था छ ।