काठमाडौँ । साउदी भ्रमणमा रहेका चिनियाँ राष्ट्रपति सी चिनफिङ र साउदी युवराज मोहम्मद बिन सलमानवीच सुरक्षा सम्झौतामा सहमति बनेको छ ।

चीन र साउदी अरेबिया सुरक्षादेखि तेलसम्मका विषयमा सहकार्य गर्न सहमत भएका हुन् । तर दुवैं देशले आपसी घरेलु विषयमा कुनै हस्तक्षेप नगर्ने पनि सहमति भएको छ ।

मानवअधिकार हनन, तेल उत्पादन लगायत मुद्दामा अमेरिकासँग चीन र साउदी दुवै देशको तनावपूर्ण सम्बन्धका बीच यी दुई देशबीच नयाँ सम्झौता भएको हो ।

दुई देशबीच सम्झौतापछि साउदी प्रेस एजेन्सीले करिब ४ हजार शब्दको संयुक्त विज्ञप्ति सार्वजनिक गरेको थियो । उक्त विज्ञप्ति अनुसार ऊर्जा, सुरक्षा मुद्दा, इरानको आणविक कार्यक्रम, यमनको संकट र युक्रेनमा रूसको युद्ध लगायत विश्वव्यापी मुद्दाहरूमा पनि दुई देशबीच सहमति भएको बताइएको छ ।

यसैबीच दुई देशबीच रक्षा क्षेत्रमा सहयोग र समन्वय विकास गर्नुका साथै आतंकवाद र यसका लागि आर्थिक सहायताविरूद्ध लड्ने कार्यमा सहयोग जारी राख्ने प्रतिबद्धता पनि व्यक्त गरिएको छ ।

तर एकअर्काको आन्तरिक नीति र घरेलु मुद्दाका विषयमा आलोचना नगर्ने पनि उनीहरूबीच सहमति भएको छ । चीन र साउदी अरब दुवै देश मानवअधिकारका विषयमा अन्तर्राष्ट्रिय समुदायमा आलोचित बन्ने गरेका छन् ।