काठमाडौं । विश्वकपको उपाधि जितेपछि अर्जेन्टिनाका कप्तान लियोनल मेसीले तत्काल अन्तर्राष्ट्रिय फुटबलबाट सन्यास नलिने घोषणा गरेका छन् ।
फाइनलमा फ्रान्सलाई पेनाल्टी सुटआउटमा ४–२ ले पराजित गर्दै अर्जेन्टिनालाई ३६ वर्षपछि उपाधि दिलाएका मेसी कतार विश्वकपको उत्कृष्ट खेलाडी चुनिएका थिए । खेल पेनाल्टीमा पुग्नु अघि अर्जेन्टिना र फ्रान्सले ३–३ को बराबरी खेलेका थिए ।
पेरिस सेन्ट जर्मन (पीएसजी)का फरवार्ड मेसीले फाइनल खेल पछि प्रतिकृया दिँदै तत्काल अन्तर्राष्ट्रिय फुटबलबाट सन्यास नलिने बताए ।

“म फुटबल मन पराउँछु । जसलाई मैले आफूसँगै लिएर हिँडेको छु । म राष्ट्रिय टिममा रमाइरहेको छु । र, विश्व च्याम्पियनको रुपमा अझ केही खेलको अनुभव बटुल्न चाहन्छु,” मेसीले भने, “पक्कै पनि म आफ्नो करिअरमा विश्वकपको उपाधि जोड्न चाहन्थे । र, अब म योभन्दा धेरै माग्न सक्दिनँ ।”

आगामी जुनमा ३६ वर्ष पुग्ने मेसी आगामी विश्वकपसम्म ३९ वर्षको पुग्नेछन् । विश्वकपबारे भने मेसीले कतार विश्वकप आफ्नो अन्तिम हुनसक्ने प्रतिकृया दिइसकेका छन् ।