काठमाडौँ । माघे संक्रान्ति पर्व नजिकिएसँगै बजारमा तरुल र चाकुको व्यापार बढेको छ ।

कालीमाटी तरकारी तथा फलफूल बजारमा माघे संक्रान्ति पर्वका लागि तरुल किन्ने भीड बढेको छ । तरुलको मूल्यमा विगतका वर्षभन्दा फरक नरहेको व्यापारीहरूले बताए ।

कालीमाटीमा तरकारी व्यापार गर्दै आएका कृष्णप्रसाद पोखरेलले तरुल माघे संक्रान्तीमा मात्रै पाउने सिजन भएकाले व्यापार हेरेर मात्रै नाफा घाटाको बारेमा भन्न सकिने बताए । उनी मानिस कत्तिको किन्न आउँछन् भन्ने कुराले मूल्य बढ्ने वा घट्ने भन्नेबारेमा थाहा हुने बताउँछन् ।

‘माघे संक्रान्तीको बेलामा मात्रै तरुलको व्यापार हुने भएकाले यो नाफा घाटाको कुरा कत्तिको किन्न आउनुहुन्छ भन्ने हेरेर थाहा हुन्छ, सर्लाही, धादिङ, मकवानपुर, सिन्धुपाल्चोक, सिन्धुली, नुवाकोटबाट तरुल आउँछन्,’ उनले भने ।

त्यस्तै, कालीमाटी तरकारी तथा फलफूल बजारमा काँक्रोको व्यापार गर्दै आएकी अप्सरा सिलवाल भने अरुबेला काँक्रो मात्रै व्यापार गर्ने भए पनि यसपटक सिजन रहेकाले तरुल मगाएको बताइन् । उनले माघे संक्रान्तीका लागि आफूले नवलपरासीबाट दुई गाडी तरुल ल्याएको बताइन् ।

उनले भने, ‘दुई गाडी तरुल ल्याएर राखेकी छु, नवलपरासीबाट ल्याएको छु, व्यापार पोहोरको जस्तै छ, बढी, घटी छैन, सामान यसपालि बढी आयो भने भाउ सस्तो हुन्छ जस्तो लागेको छ ।’

यहीबेला बजारमा चाकुको व्यापार पनि बढ्ने गर्छ । चाकु गत वर्षको मूल्यमै बिक्री भइरहेको व्यापारीहरू बताउँछन् ।