काठमाडाैं । वलिउड अभिनेता कार्तिक आर्यनको फिल्म ‘शेहजादा’ शुक्रबार रिलिज भएको छ । ‘भूल भुलैया २’ को ठूलो सफलतापछि कार्तिकको फिल्मले बक्स अफिसमा फेरि एकपटक धमाका गर्ने अपेक्षा गरिएको थियो । तर ‘शेहजादा’ले ओपनिङ विकेन्डमा खासै केही गर्न सकेनन् । ‘शेहजादा’काे कमजाेर कामइले कार्तिकको विगतको सफलतामा प्रश्न उठिरहेको छ ।

काेभिडका कारण गत वर्ष धेरैजसो बलिउड स्टारका फिल्मले सिनेमाघरमा त्यति माया पाएका थिएनन्। तर यस वर्ष फिल्म उद्योगमा धेरै सकारात्मक कुरा देखिए । पछिल्लाे समय सबैको मनमा राज गर्ने एक स्टार कार्तिक आर्यन थिए। कार्तिकको ‘भूल भुलैया २’ ले बक्स अफिसमा उत्कृष्ट व्यापार गरेको थियो र विश्वभर २५० करोडभन्दा बढी कमाई गरेको थियो । विगत धेरै वर्षदेखि कडा परिश्रम गरिरहेका कार्तिकका लागि २०२२ एउटा ब्रेकआउट वर्ष भएको छ र उनको स्टारडमको स्तर फरक भएको छ। 

‘भूल भुलैया २’ को अभूतपूर्व सफलताको छायामा कार्तिकको नयाँ फिल्म ‘शेहजादा’ गत शुक्रबार हलमा रिलिज भएको छ । अग्रिम बुकिङ सुरु भएदेखि नै बक्स अफिसमा चासो राख्ने मानिसले ‘शेहजादा’ त्यो गतिमा अगाडि बढेको देखेनन् । पहिलो दिन शुक्रबार फिल्मले ६ करोड मात्रै ओपनिङ कलेक्सन गरेको थियो । शनिबार पनि ‘शेहजादा’ले बक्स अफिसमा खासै कमाइ गर्न सकेन र उक्तदिन फिल्मले ६.६५ करोड मात्रै कमाउन सक्याे । 

कार्तिकको अहिलेकाे स्टारडमलाई हेर्दा ‘शेहजादा’ले दुई दिनमा १३ करोडभन्दा कम कमाउने अनुमान कसैले पनि गरेका थिएनन् । जबकि ‘भूल भुलैया २’ ले पहिलो दिनमै १४.११ करोड कमाएको थियो । दुई दिनको सुस्ततापछि आइतबारबाट चलचित्रले राम्रो कमाइ गर्ने अपेक्षा गरिएको थियो । तर, तेस्रो दिन पनि ‘शेहजादा’ फ्ल्याट नै रहेको तथ्यांकले देखाएको छ । 
फिल्मले तेस्रो दिन पनि ८ करोडको आँकडा पार गर्न सकेन । रिपोर्टका अनुसार ‘शेहजादा’ले आइतबार बक्स अफिसमा ७.५५ करोड भारु कलेक्सन गरेको छ ।

यस अनुसार ‘शहजादा’ फिल्मले ३ दिनमा मुस्किलले २० करोड मात्र कमाएको छ । ‘भूल भुलैया २’ ले सुरुको ३ दिनमा बक्स अफिसमा करिब ५६ करोडको कलेक्सन गरेको थियाे । त्यसको तुलनामा ‘शेहजादा’को ओपनिङ वीकेण्ड कलेक्शन आधाभन्दा निकै कम छ ।