काठमाडौं । बलिउड अभिनेता अक्षय कुमार पछिल्लो समय आफ्ना फिल्म फ्लपका कारण निकै चर्चामा आइरहेका छन् । उनका फिल्महरु बक्सअफिसमा लगातार फ्लप भइरहेका हुन्। पछिल्लो समय उनका चार फिल्म लगातार फ्लप भइसकेका छन् ।

फिल्म ‘सेल्फी’ गत शुक्रबारदेखि प्रदर्शनमा आएको छ। फिल्मले रिलिजकाे पहिलाे दिन बक्स अफिसमा २ करोड ५५ लाख भारूको कमाइ गरेको छ। उनको यो फिल्म फ्लप हुने देखिएको छ । यस विषयमा अक्षयले प्रतिक्रिया दिएका छन् । एक अन्तर्वार्तामा उनलाई फिल्म फ्लपको बारेमा सोधिएको प्रश्नमा उनले यस्तो पहिलो पटक नभएको जवाफ दिएका छन् ।

अक्षयले भने, ‘मेरा धेरै फिल्महरू बक्स अफिसमा चल्न सकेनन् । यसमा मेरो बाहेक कसैको दोष छैन । दर्शक बदलिदै गएकाले अब मानिसहरु फिल्ममा फरक कुरा हेर्न चाहन्छन् । यसका लागि हामीले पनि केहि परिवर्तन गर्नुपर्छ, त्यसका लागि म सक्दो प्रयास गरिरहेको छु ।

अक्षय कुमारले थप भने, ‘जब तपाईंका फिल्महरू लगातार फ्लप हुन्छन्, यो तपाईंको लागि परिवर्तनको अलार्म हो। म जे गर्न सक्छु गर्ने प्रयास गर्छु। यसको लागि हामीले श्रोता वा अरू कसैलाई दोष दिनु हुँदैन। यो १०० प्रतिशत मेरै गल्ती हो।