काठमाडौं । शुक्रबारदेखि हलमा तीन नयाँ फिल्म एकसाथ प्रदर्शनमा आएका छन् । नयाँ रिलिजमा ‘नाइँ नभन्नु ल ६’, ‘प्रसाद २’ र ‘कैदीको पत्र’ कथानक फिल्म रहेका छन् । यि सँगै चलचित्र ‘जारी’ पनि धेरै शोसहित तेस्रो सातामा प्रवेश गरेको छ ।

विकासराज आचार्य निर्देशित ‘नाइँ नभन्नु ल ६’ मा आशिर्वाद बराल र आँचल शर्माको मुख्य भूमिका रहेको छ । २ घण्टा ५ मिनेट लामो यो फिल्ममा किशोर र तन्नेरी पुस्ताको प्रेम र परिवारको कथावस्तु राखिएको छ । फिल्ममा प्रियंका कार्की, केकी अधिकारी, सरोज खनालको पनि अभिनय छ ।

सुदर्शन थापा निर्देशित ‘प्रसाद २’मा विपिन कार्की, केकी अधिकारी, अर्पण थापा, महेश त्रिपाठी, कमलमणि नेपाल, प्रकाश घिमिरे, विशाल पहाडी आदिको अभिनय छ । अघिल्लो श्रृंखला जहाँ सकिएको थियो, त्यहीँबाट फिल्म सुरु छ । पात्र मात्र परिवर्तन छन् । यसै साता काठमाडौंमा भएको प्रिमियरमा फिल्मले राम्रो प्रतिक्रिया पाएको थियो ।

सनम कुमार वैरागी निर्देशित ‘कैदीको पत्र’ फिल्म प्रेम र रोमान्सको कथामा निर्माण भएको फिल्म हो । जीवनमा पाएको खुसीलाई सम्हाल्न नसक्दा मानिसले व्यहोर्नुपर्ने उतारचढाव र भोग्नुपर्ने कठिनाइलाई फिल्मले कथा बनाएको छ । कुनाल विश्व, म्याडिसन लाजारुस, सलिना थापाको शीर्ष भूमिका रहेको फिल्मले बेलायतको नेपाली समुदायमा भएको त्रिकोणात्मक सम्बन्धमा आउने उतारचढावको कथा देखाउँछ ।