काठमाडौँ । सत्ता गठबन्धनको सबैभन्दा ठूला दल नेपाली कांग्रेसका सांसद प्रदीप पौडेलले सरकारको निर्णयप्रति विरोध जनाएका छन् । सरकारले नेकपा माओवादीका अयोग्य लडाकुलाई २/२ लाख रुपैयाँ राहत दिने निर्णयप्रति विरोध जनाएका हुन् ।

शुक्रबार प्रतिनिधिसभा बैठकमा विशेष समय लिएर बोल्दै उनले आर्थिक संकट बेला सरकारले संसद छलेर पैसा बाँड्ने निर्णय गरेको भन्दै आपत्ति जनाए । उनले यसबारे संसदलाई तत्काल जानकारी गराउन पनि सरकारसँग माग गरे ।

‘अयोग्य लडाकुलाई २/२ लाख रुपैयाँ निर्णय भएको भन्ने कुरा विभिन्न माध्यामबाट बाहिर आइरहेको छ, यस्तो आर्थिक संकटको बेलामा यो निर्णय अपारदर्शी ढंगले संसदलाई छलेर गर्नु स्वभाविक होइन,’ उनले भने, ‘त्यस कारण म सर्वप्रथम सभामुखमार्फत् सरकारलाई माग गर्न चाहन्छु, यो विषयमा के भएको हो ? यथार्थ जानकारी सदनलाई गराइयोस् ।’

सांसद पौडेलले आर्थिक संकटमा सरकारले अपारदर्शी ढंगले बजेट खर्च गर्न नमिल्ने बताए ।