काठमाडौँ । पूर्वअर्थमन्त्री सुरेन्द्र पाण्डेले सरकारले आगामी बजेटमा चालु खर्च कटौती गर्नुको विकल्प नभएको बताएका छन् । बिहीबार काठमाडौँमा भएको नेपालको अर्थतन्त्र, वर्तमान अवस्था र आगामी दिशा अन्तरक्रिया कार्यक्रममा बोल्दै उनले यस्तो बताएका हुन् ।

पूर्वअर्थमन्त्री पाण्डेले एमाले सरकारमा भएको बेला वितरणमुखी बजेट ल्याएको स्वीकार गर्दै अहिलेको अवस्था धेरै उत्साहित भएर बजेट बाँड्न सक्ने स्थिति नभएको बताए । उनले अहिले राजनीतिक पार्टीहरूले एक अर्कालाई आरोप प्रत्यारोप लगाउँदै अर्थतन्त्रको सिङ्गो जहाज खतरामा पर्ने अवस्था देखिएको दाबी गरे ।

उनले अर्थमन्त्रीले सरकारसँग वित्त नीतिमा ठाउँ छैन सबै राष्ट्र बैंकले मौद्रिक नीतिमा गर्नु पर्छ भन्नु अनुचित र व्यवहारिक नभएको बताए । उनले मुलुकको समग्र अर्थतन्त्रको जिम्मेवारी राष्ट्र बैंकको नभएर सरकार र अर्थमन्त्रीको भएको बताएका थिए ।

‘सरकारका अर्थमन्त्रीले वित्त नीतिमा ठाउँ छैन, अर्थतन्त्रको सुधारका लागि आवश्यक नीति राष्ट्रले गर्नु पर्छ भन्ने कुरा व्यहारिक र सैद्धान्तिक रुपले गलत हो,’ उनले भने, ‘अर्थतन्त्रको ओभरल डाटा अर्थमन्त्री र सरकार हो, राष्ट्र बैंक होइन, रोजगारी र पुँजीगत खर्च बढाएर स्पेश बनाउँछ त्यो राष्ट्र बैंकका गभर्नरले सक्दैनन् ।’

उनले बैंकले कर्जा दिन राष्ट्र बैंकले सक्ने बताउँदै अर्थतन्त्र चलायमान बनाउने स्पेश अर्थमन्त्री वा सरकारसँग मात्रै भएको बताए । उनले सरकार आफ्ना कमजोरी करेक्सन गर्न तयार हुनु पर्ने बताए ।