काठमाडौँ । काठमाडौँ उपत्यका प्रहरी कार्यालय रानीपोखरीका प्रमुख प्रहरी अतिरिक्त महानिरीक्षक (एआईजी) श्याम लाल ज्ञवाली र नक्कली भुटानी शरणार्थी प्रकरणमा संलग्न सानु भण्डारीबीच भेट गरेको खुलासा भएको छ । उनीहरूबीच सोमबार दिउँसाे २ बजे भेट भएको हो ।

नक्कली शरणार्थी प्रकरणमा पक्राउ गरिएकाहरूलाई अनुसन्धान सकेर प्रहरीले सरकारी वकिललाई प्रतिवेदन बुझाइसकेको छ । सरकारी वकिलको कार्यालयले पनि सानु भण्डारीसहितका आरोपितलाई विभिन्न मुद्दा माग दाबी गरेको छ ।

नक्कली शरणार्थी प्रकरणका आरोपितहरू हाल अदालती बयानका क्रममा रहेका छन् । यस्तो अवस्थामा एआईजी ज्ञवाली र आरोपित भण्डारीबीचको भेटलाई सन्देहपूर्ण मानिएको छ ।

अदालती बयानमा सहभागी हुन बाँकी रहेका आरोपित भण्डारीलाई आफ्नो कार्यालयमा बोलाएर एआईजी ज्ञवालीले बयान फेर्न दबाब दिएको आरोप लागेको छ ।

‘अदालती बयानका क्रममा रहेका भण्डारीलाई प्रहरीले आफ्नो कार्यालयमा बोलाउनुलाई सन्देहपूर्ण मानिन्छ, अदालत पुगिसकेका आरोपितलाई अनुसन्धान अधिकृतले पनि थप बयान लिन वा भेटघाट गर्न मिल्दैन,’ प्रहरीका एक उच्च अधिकारीले भने, ‘तर, ज्ञवालीले भण्डारीसँग भेटेका छन्, यस भेटलाई सामान्य मान्न सकिन्न ।’