काठमाडौं । स्वास्थ्य तथा जनसंख्या मन्त्री मोहनबहादुर बस्नेतले जनता स्वास्थ्य उपचार पाउने मौलिक हकबाट बन्चित भएको बताएका छन् । संविधानमा उल्लेख व्यवस्था जनताले नपाएको स्वास्थ्यमन्त्री बस्नेतले स्वीकारेका हुन् ।

राष्ट्रिय सभामा आर्थिक वर्षको बजेटमा उठेका प्रश्नहरुको जवाफ दिँदै मन्त्री बस्नेतले भने, ‘संविधानमा आधारभूत स्वास्थ्य निःशुल्क उपलब्ध गराउने, यो जनताको नैसर्गिक अधिकार हो, मौलिक हक हामीले कायम गरेका छौं । तर मैले अब नढाँटिकन भन्नुपर्छ जे भनिएको छ, त्यस्तो हुन सकिरहेको छैन ।’

उनले आधारभूत स्वास्थ्य निःशुल्क उपलब्ध गराउने ढंगले सरकार अघि बढेको जानकारी दिए । ‘आधारभूत स्वास्थ्य निःशुल्क उपलब्ध गराउने विषयमा स्वास्थ्य मन्त्रालय, माननीयज्यूहरु सबैको साथ सहयोगको कारणले पनि हामी प्रभावकारी ढंगबाट अगाडि बढेका छौं,’ उनले भने ।