काठमाडाैं । वेस्ट इन्डिजविरुद्धको पहिलो टेस्टमा भारतले १४१ रनकाे जित निकालेकाे छ ।

डेब्यु खेलाडी यशस्वी जैसवाल यस जितका नायक थिए। उनले १७१ रन बनाए र खेलको प्लेयर अफ द म्याच भए । कप्तान रोहित शर्माले पनि शतक पार गरे।

डोमिनिकाको विन्डसर पार्क मैदानमा टस जितेर ब्याटिङ रोजेको वेष्ट इन्डिजको टोली पहिलो इनिङ्समा १ सय ५० रनमा अलआउट भएको थियो । जवाफमा भारतले आफ्नो पहिलो इनिङ ४२१/५ मा घोषित गर्यो। वेस्ट इन्डिज दोस्रो इनिङ्समा १३० रनमा अलआउट भएको थियो ।

खेलमा भारतीय स्पिनरहरूले बलियो प्रदर्शन गरेका थिए । उनीहरुले वेस्ट इन्डिजका २० मध्ये १७ विकेट लिएका थिए । स्पिनरले पहिलो इनिङ्समा ८ विकेट र दोस्रो इनिङ्समा ९ विकेट लिएका थिए ।

दोस्रो खेल जुलाई २० देखि पोर्ट अफ स्पेनमा हुनेछ।