काठमाडौँ । पर्सा जिल्लाको वीरगञ्ज महानगर १६ स्थित भन्सार गेटबाट साउन ४ गते सशस्त्र प्रहरीले करिब दुई लाख रुपैयाँ बराबरको चोरीको सामान बरामद गरेको छ ।

भारतबाट नेपालतर्फ ल्याउँदै गरेको लत्ता कपडा, मोबाइल पार्टस्, हार्डवेयर तथा किराना सामान प्रस्तावित सीमा सुरक्षा गुल्म वीरगञ्जले बरामद गरेको हो । बरामद सामान भन्सार कार्यालय वीरगञ्जमा बुझाइएको छ ।

जुत्ता र गार्मेण्टको सामानसहित दुई वटा ट्रक नियन्त्रणमा सशस्त्र प्रहरी र राजश्व अनुसन्धान कार्यालयको संयुक्त टोलीले करिब एक करोड ८४ लाख ५१ हजार १९२ रुपैयाँ बराबरको जुत्ता र गार्मेण्टको सामानसहितको दुई वटा ट्रक नियन्त्रणमा लिएको छ ।

सुनसरी जिल्लाको कोशी गाउँपालिका ८ स्थित पूर्व-पश्चिम लोकमार्गबाट साउन ४ गते प्रस्तावित सीमा सुरक्षा गुल्म हरिपुर र राजश्व अनुसन्धान कार्यालय इटहरीले ना ५ ख ४३१ नम्बरको कन्टेनर ट्रक नियन्त्रणमा लिएको हो ।

यसैगरी, सुनसरी जिल्लाको कोशी गाउँपालिका ३ जमुवा चोकस्थित पूर्व–पश्चिम लोकमार्गबाट साउन ४ गते बिओपी श्रीपुर र राजश्व अनुसन्धान कार्यालयले जुत्ता र गार्मेण्टको सामानसहितको ना ३ ख ४५७९ नम्बरको कण्टेनर ट्रक नियन्त्रणमा लिएको छ ।

विशेष सूचनाको आधारमा मोरङबाट काठमाडौँतर्फ आउँदै गरेको उल्लेखित ट्रकहरूमा जाँच गर्दा प्रज्ञापन पत्रमा उल्लेख भएको भन्दा बढी सामान फेला परेपछि नियन्त्रणमा लिइएको हो ।

नियन्त्रणमा लिइएको जुत्ता र गार्मेण्टको सामानसहित दुई वटै ट्रक आवश्यक अनुसन्धानको लागि राजश्व अनुसन्धान कार्यालय इटहरीमा बुझाइएको छ ।