काठमाडौँ । चिनियाँ तस्करले हङकङबाट भित्र्याएको ‘ब्रेक–सुबाट बरामद गरिएको सुनको गुणस्तर उत्कृष्ट भएको नेपाल राष्ट्र बैंकले जनाएको छ । बैंकको टक्सार महाशाखाले गुणस्तर परीक्षण गर्दा सुन ‘९९९’ शुद्ध रहेको पुष्टि भएको हो । सामान्यतया बजारमा २२ क्यारेट र २४ क्यारेट भनेर सुनको गुणस्तर वर्गीकरण गर्ने गरिन्छ ।

तर, राष्ट्र बैंकले नम्बरका आधारमा सुनको गुणस्तर हेर्ने गर्छ । जसअनुसार ‘९९९’ भनेको सबैभन्दा उच्च गुणस्तरको (शुद्ध) सुन हो । नेपालमा यति शुद्ध गुणस्तरको सुन धेरै कम रहेको राष्ट्र बैंकले बताएको छ ।

नेपाल राष्ट्र बैंकलाई सुनको सिक्का (असर्फी) का लागि सबैभन्दा उच्च गुणस्तरको सुन चाहिन्छ । यसकारण सरकारको अनुमति पाएमा कानुन अनुसार सुन आफैंले खरिद गर्न तयार रहेको राष्ट्र बैंक बताएको छ ।

टक्सार महाशाखाले गत साता ‘ब्रेक–सु’बाट निकाल्दा सुनको परिमाण ६० किलो ७८९ ग्राम कायम भएकोमा गालेपछि घटेर ६० किलो ७१६ ग्राम कायम भएको थियो । सुन गालेर ‘बिस्कुट’ बनाएपछि राष्ट्र बैंकले सुनको गुणस्तर मापन गर्दा सबैभन्दा उच्च गुणस्तरको भेटिएको हो ।