काठमाडाैं । एसिया कप क्रिकेटमा आज भारत र पाकिस्तानबीच भिडन्त हुँदैछ । यस खेललाई लिएर विश्वभरका फ्यान र क्रिकेट विज्ञहरुले आ–आफ्नो राय दिइरहेका छन् । कसैको नजरमा भारतले जित्ने छ भने कसैले पाकिस्तानलाई बलियो भनेका छन् । दुवै टोलीको फरक फरक तथ्यांकका आधारमा तुलना भइरहेको छ । यो खेल श्रीलंकाको पल्लेकेले अन्तर्राष्ट्रिय क्रिकेट रंगशालामा नेपाली समय अनुसार दिउँसो ३:१५ मा सुरु हुनेछ ।

एसिया कपमा भारत र पाकिस्तान १७ औं पटक आमनेसामने हुँदैछन् । एसिया कपको पछिल्ला १५ सिजनमा दुवै टोलीले टी–२० र एकदिवसीय गरी १६ पटक भिडेका छन् । यी १६ खेलमध्ये एकपटक (सन् १९९७)काे नतिजा आउन सकेन। बाँकी १५ खेलमा दुई टोलीबीच कडा प्रतिस्पर्धा भएको थियो ।

यदि तथ्याङ्क हेर्ने हो भने, सन् १९८४ देखि २०१८ सम्म भारत र पाकिस्तानले एसिया कपको एकदिवसीय खेलमा एकअर्कासँग १३ खेल खेलेका छन् । जसमा भारतीय टोलीले पाकिस्तानलाई ७ पटक पराजित गरेको छ । पाकिस्तानले पाँच पटक जितको स्वाद चाखेको छ भने एक खेलकाे नतिजा भने आउन सकेन ।

भारतीय टोलीले सन् १९८४, १९८८, २००८, २०१०, २०१२ र २०१८ मा दुई पटक पाकिस्तानलाई हराएको छ । अर्कोतर्फ, पाकिस्तानले सन् १९९५ को एसिया कपमा भारतविरुद्धको पहिलो खेल शारजाहको मैदानमा जितेको थियो । यसपछि सन् २०००, २००४, २००८ र २०१४ मा पनि भारतीय टोलीलाई हराएको थियो ।

टी–२० को कुरा गर्ने हो भने एसिया कपमा भारत र पाकिस्तानले तीन पटक मात्रै आमनेसामने गरेका छन् । एक पटक २०१६ मा र अर्काे पटक २०२२ मा उनीहरु आमनेसामने भएका थिए। सन् २०१६ मा भारतले पाकिस्तानलाई ५ विकेटले हराएको थियो । र सन् २०२२ मा समूह चरणमा भारत र सुपर–४ मा पाकिस्तान विजयी भएको थियो । यी तथ्याङ्कलाई हेर्दा शनिबार हुने भारत–पाकिस्तान खेलको उत्साह चरम सीमामा हुने प्रष्ट हुन्छ ।

एसिया कपमा भारत-पाकिस्तान खेलको नतिजा :
१९८४ : भारत ८४ रनले विजयी, शारजाह
१९८८ : भारत ४ विकेटले विजयी, ढाका
१९९५ : पाकिस्तान ९७ रनले विजयी, शारजाह १
१९९७ : कुनै नतिजा आएन, कोलम्बो
२००० : पाकिस्तान ४४ रनले विजयी , ढाका
२००४ : पाकिस्तान ५९ रनले विजयी, कोलम्बो
२००८ : भारत ६ विकेटले विजयी, कराँची
२००८ : पाकिस्तान ८ विकेटले विजयी, कराँची
२०१० : भारत ३ विकेटले विजयी, डम्बुला
२०१२ : भारत ६ विकेटले विजयी, मिरपुर
२०१४ : पाकिस्तान १ विकेटले विजयी, मिरपुर
२०१६ : भारत ५ विकेटले विजयी, मिरपुर
२०१८ : भारत ८ विकेटले विजयी, दुबई
२०१८ : भारत विजयी ९ विकेटले विजयी, दुबई
२०२२ : भारत ५ विकेटले विजयी, दुबई
२०२२ : पाकिस्तान ५ विकेटले विजयी, दुबई

आज हुने खेलका लागि पाकिस्तानले प्लेइङ–११ घोषणा गरेको छ । पाकिस्तानले नेपालविरुद्धको उद्घाटन खेलमा जित हासिल गरेका खेलाडीलाई प्लेइङ–११ मा मौका दिएको छ । अर्कोतर्फ, भारतीय टोलीको प्लेइङ–११ टसको समयमा मात्र थाहा हुनेछ । भारत तीन विशेष फास्ट बलर, दुई अलराउन्डर, एक स्पिनर र पाँच ब्याट्सम्यानको साथ जाने सम्भावना छ।

पाकिस्तानको प्लेइङ–११ : बाबर आजम (कप्तान), फखर जमान, इमाम उल हक, सलमान अली आगा, इफ्तिखार अहमद, मोहम्मद रिजवान (विकेटकीपर), शादाब खान (उपकप्तान), मोहम्मद नवाज, हरिस रउफ, नसीम शाह र शाहीन शाह अफ्रिदी।

भारतको सम्भावित प्लेइङ–११ :  रोहित शर्मा (कप्तान), शुभमन गिल, विराट कोहली, इशान किशन (विकेटकिपर), श्रेयस अय्यर, हार्दिक पाण्ड्या, रविन्द्र जडेजा, , कुलदीप यादव, मोहम्मद शामी, मोहम्मद सिराज, जसप्रित बुमराह।