काठमाडौं । वडाध्यक्ष मुकुन्द रिजालको निधनमा काठमाडौं महानगरपालिकाले भोलि (शुक्रबार)शोक बिदा दिएको छ।

काठमाडौं महानगरपालिका–१६का वडाध्यक्ष रिजालको बिहीबार बिहान ग्रान्डी अस्पतालमा निधन भएको हो। रिजालको निधनमा शुक्रबार महानगर अन्तर्गतका कार्यालयहरूमा शोक बिदा दिइएको महानगरका प्रवक्ता नवीन मानन्धरले जानकारी दिए।

‘आज वडाध्यक्षजी बित्नुभएको हुँदा भोलि शोक बिदा दिइएको छ,’ मानन्धरले भने।

स्वास्थ्यमा समस्या देखिएपछि भदौ १७ गते रिजाललाई ग्रान्डी अस्पताल लगिएको थियो। दुवै फोक्सोमा सिभियर निमोनिया (भाइरल निमोनिया) देखिएपछि सघन उपचार कक्षमा भर्ना गरेर उपचार गराइरहेका रिजालको उपचारका क्रममा आज बिहान ७ः३० बजे निधन भएको थियो ।

रिजाल कांग्रेस काठमाडौं क्षेत्र नम्बर ७ सभापति र महानगर वडा नम्बर १६ अध्यक्षमा दुई पटक निर्वाचित भएका थिए।